Bakıda "Range Rover"li qadın mühafizəçini necə ölümcül döydürdü... - FOTO

Bakıda "Range Rover"li qadın mühafizəçini necə ölümcül döydürdü... - FOTO
16:05 3 Oktyabr 2016
1077 Ölkə
Ölkə mətbuatı
A- A+

Bakının Zərifə Əliyeva küçəsində, "Marriott Absheron" otelinin arxasında yerləşən elit yaşayış kompleksinin həyətinin mühafizəçisi "Range Rover"li qadının qəzəbinə tuş gəlib və ölümcül döyülüb.

Criminal.az saytı bu hadisənin bəzi təfərrüatlarını yazıb. Bildirilirdi ki, hadisə bir neçə gün əvvəl baş verib.

Kimliyi göstərilməyən gənc qadın idarə etdiyi ''-- -- 003'' dövlət nömrə nişanlı son model ''Range Rover'' markalı avtomobilni Z.Əliyeva küçəsində park etmək istəyib. Lakin parklama üçün nəzərdə tutulan ərazidə boş yer olmadığından maşını yaşayış kompleksinin həyətinə sürüb. Binanın mühafizəçisi isə həyətdə maşın saxlamağın qadağan olunduğunu deyib.

Bu zaman sözügedən xanım kiməsə zəng edərək mühafizəçidən şikayətlənib. Az sonra qara ''AA'' dövlət nömrə seriyalı ''Mercedes'' markalı avtomobillə iki nəfər həmin yerə gəlib. Onlar mühafizəçini huşunu itirənədək döyüb, sonra isə maşına əyləşərək ərazini tərk ediblər. Yerdə qan içərisində olan mühafizəçini təcili yardım maşını xəstəxanaya aparıb. Məlum olub ki, mühafizəçini döyən şəxs elə sifarişi  verən qadının əridir. O, hadisədən sonra həbs olunub.

Milli.Az bildirir ki, virtualaz.org bu hadisəni araşdırıb və bəzi yeni detalları öyrənə bilib. Məlum olub ki, hadisə bir həftə əvvəl baş verib. Həmin yaşayış kompleksinin həyətindəki mühafizə postunda dayananlar əməkdaşımıza hadisə barədə "xəbərsiz olduqlarını, heç nə bilmədiklərini" deyiblər. Bununla belə yaxınlıqda işləyən şəxslərdən biri adının açıqlanmaması şərti ilə hadisənin təfərrüatlarını danışıb.

Hadisə şahidinin dediklərindən: "Bəli, belə hadisə olub. Həmin qadın "Range Rover"lə gəlib, parklama ərazisində boş yer yox idi deyə mühafizəçidən tələb edib ki, maşını binanın həyətinə buraxsın. Deyib ki, yaxınlıqdakı "Room" mebel salonuna baş çəkib qayıdır. Ancaq deyəsən, qadın oradan çıxıb gözəllik salonuna gedib və maşınını götürməyə gec qayıdıb. Ola bilsin, mühafizəçi gec qayıtdığı üçün ona irad tutub, yaxud nəsə qadının xoşuna gəlməyən söz deyib. Mən hadisəni aralıdan müşahidə edirdim, onu gördüm ki, AA seriyalı qara avtomobillə gələn ortaboylu gənc mühafizəçini amansızlıqla döyməyə başladı. İnsanı elə döyməzlər, bu, qəddarlıqdır, vəhşilikdir. Mühafizəçi zəif cüssəli gənc idi, heç bir müqavimət göstərə bilmədi. Yaxınlıqdakıların da heç biri müdaxilə etmədi. O qədər döydü ki, mühafizəçi huşunu itirdi, qadının çağırdığı şəxs isə onu küçənin ortasında qoyub heç nə olmamış kimi getdi. Tutaq ki, həmin mühafizəçi qadına nəsə irad tutub, buna görə adamı elə döyərlər?"

Şahidin bildirdiyinə görə, qadın və onun çağırdığı şəxs getdikdən sonra yaxınlıqdakılardan kimsə təcili yardım çağırıb. Təcili yardım huşsuz vəziyyətdə olan mühafizəçini xəstəxanaya aparıb. Daha sonra hadisə yerinə polislər gəliblər, ətrafdakı videomüşahidə kameralarından görüntülər götürülüb. "Görünür, mühafizəçi xəstəxanaya aparıldığı üçün istər-istəməz polisə məlumat verilib. Ancaq hadisənin sonrasının necə olduğu haqda məlumatım yoxdur. Bu ərazidə hər tərəf kameradır, yəqin ki, istəsələr, həmin adamı tapmaq heç bir çətinlik törətməz", - mənbə bildirdi.

Bəs şahid və hadisəni görən başqaları niyə mühafizəçinin xüsusi amansızlıqla döyülməsinə müdaxilə etməyiblər? Şahid deyir ki, heç kim buna cəhd etməyib. "Neyləsinlər? İndi bilmirik hansı zəmanədir? Elə harın, pullu adamlar üçün kimisə öldürüb qanını batırmaq nə çətin şeydir?" - şahid acizanə şəkildə çiyinlərini çəkib deyir.

Virtualaz.org hadisə barədə məlumat almaq üçün Səbail rayon 39-cu polis bölməsinə zəng vurub. Bölmədən növbətçi deyib ki, belə hadisə haqda eşitməyib. "Həmin adamın adı, familiyası olsa, araşdırmaq olardı", - növbətçi deyib.

Hadisəni diqqətdə saxlayacağıq və mühafizəçini ölümcül döyən "VİP-persona" barədə məlumatlar əldə etməyə çalışacağıq.

Milli.Az



Xəbərin orijinal ünvanı: http://news.milli.az/country/475636.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR