Övladını məktəbəhazırlıq qruplarına göndərən valideynlər dərs vəsaitlərini pulla alırlar.
Dərslərə oktyabr ayının 1-dən start verilib. Ancaq hələ də məktəb tərəfindən qruplara kitab paylanmadığından valideynlər multimediya tədris resurslarını özləri almağa məcbur olublar. Baxmayaraq ki, orta məktəb şagirdləri üçün dərs vəsaitləri pulsuz paylanılır.
Milli.Az xezerxeber.com-a istinadən bildirir ki, məktəbəhazırlıq məşğələləri üçün "Nitq inkişafı", "Ətraf aləmlə tanışlıq", "Məntiqi və riyyazi təfəkkürün inkişafı" , "Təsviri fəaliyyət" olmaqla 4 kitab komplekt şəkildə satılır.
Müəlimllər, valideynlərə kitabların məktəb tərəfindən verilməyəcəyini və özlərinin almalı olduqlarını bildiriblər.
Məktəbəhazırlıq üçün nəzərdə tutulan 17 manatlıq kitab dəstinin baha olduğunu düşünən əksər valideynlər isə daha ucuz başa gəlsin deyə onları tək-tək almağa başlayıblar.
Təhsil Nazirliyindən isə bildirilir ki, təkcə Bakı şəhəri üzrə məktəbəhazırlıq qruplarına yazılan uşaqların sayı 20 mini ötüb. Bölgələrdə isə onların sayı iki dəfədən də çoxdur. Elə valideyn var ki, uşağın adını məktəbə hələ yeni yazdırır. Hazırda Təhsil Nazirliyi tərəfindən uşaqların siyahısı dəqiqləşdirilir. Məktəbəhazırlıq məşğələləri ölkə üzrə yeni təcrübə olduğundan işlər ona görə uzanır. Yaxın gələcəkdə orta məktəbdə olduğu kimi məktəbəhazırlıq qruplarının uşaqları üçün də kitablar pulsuz veriləcək.
Milli.Az
