Aktual mövzular: Dollar alış-satışı , Hava haqqında, Məzənnə, Neftin qiyməti

Fanatların "Fanat.Az"ı - 8 yaşında

Fanatların "Fanat.Az"ı -   8 yaşında

Date: 5 October 2016 11:57

Bu gün Fanat.Az-ın ad günüdü. 2008-ci ilin bu günündə fəaliyyətə başlayan saytımız 8 yaşını qeyd edir.


Yarandığı gündən futbol fanatlarına xitab edən, onlar üçün tribunaya çevrilən Fanat.Az qısa zamanda azarkeşlərin sevimlisinə çevrildi. Rəhbərlərin yox, futbolun ən böyük dəyəri olan fanatların yanında olduq. Onların istəklərini, etirazlarını rəhbərlərin diqqətinə çatdırdıq, problemlərin aradan qalxması, Azərbaycan futbolunun inkişafı uğrunda mübarizə apardıq.


Fanat.Az-ın heç zaman vəzifəli, pullu himayəçisi olmadı. KASIB futbol fanatlarının KASIB saytı olaraq fəaliyyət göstərdi. Kiçik büdcə hesabına böyük işlər görməyə çalışdıq və qarşımıza qoyduğumuz məqsədlərin bir çoxuna nail olduq. Hər zaman haqqın tərəfində olduq, haqqı nahaqqın ayağına vermədik.


Fanat.Az ölkənin ilk Azərbaycandilli xəbər portalı oldu. Fanat.Az-dan sonra bir çox saytlar fəalliyyətə başladı və böyük bir rəqabət mühiti formalaşdı. Bu da Fanat.Az-ın inkişafı, böyüməsi üçün stimul oldu. Hətta rəqiblərimizin belə Fanat.Az-ın inkişafında böyük xidmətləri oldu. Sağlam rəqabət bizi daha məsuliyyətli, daha güclü etdi.


Bəzən hədələndik, məhkəməyə verildik. Amma heç zaman qorxmadıq, geri çəkilmədik. İlk gündən qarşımıza qoyduğumuz amallar uğrunda savaşdıq, mübarizəmizi davam etdirib, hədəflərimizə çatdıq. 


Bəzən zəiflədik, tam gücümüzü ortaya qoymadıq, əvvəlki kimi çalışa bilmədik. Amma dəyərli OXUCUMUZ heç zaman bizdən üz döndərmədi, həmişəki kimi yanımızda oldu, etimad göstərdi. Bu da bizə yeni güc, əlavə məsuliyyət verdi.


Lənkərandan Gəncəyə, Zaqataladan Qəbələyə, ordan Bakıya qədər ölkənin futbol fanatlarının istinad nöqtəsi, tribunası oldu Fanat.Az. 


8 il uzun zaman olsa da, çox və son deyil. Qarşıda bizi mübarizələrlə dolu uzun illər gözləyir. Qarşıya qoyduğumuz bir çox hədəflərə çatsaq da, bir çoxları hələ də reallaşmamış qalıb. Mübarizə davam edir və Azərbaycan futbolunu istədiyimiz səviyyədə görənə qədər davam edəcək. Və inanırıq ki, haqq mübarizəsində dəyərli OXUCULARIMIZ hər zamankı kimi yanımızda olacaq, dəstəyini əsirgəməyəcək. 


Bu günə qədər Fanat.Az-a dəstək olan hər kəsə - azarkeşlərə, futbol ictimaiyyətinin nümayəndələrinə və təbii ki, dəyərli həmkarlarımıza təşəkkür edirik. O həmkarlara ki, ilk gündən Fanat.Az-ı özlərinə doğma hesab etdilər, şablonlaşmış idman mediasına yeni yeni nəfəs gətirən bu saytın fəaliyyəti, inkişafı naminə əllərindən gələn dəstəyi verdilər. Hamınıza təşşəkkürlər...


Fanat.Az


Tags:  Fanatların FanatAzı yaşında

RƏYLƏR


Top news