Aktual mövzular: Dollar alış-satışı , Hava haqqında, Məzənnə, Neftin qiyməti

Sabir Sultanovun 70 illiyi qeyd olundu

Sabir Sultanovun 70 illiyi qeyd olundu

Date: 5 October 2016 13:05

Azərbaycan Dövlət Musiqili Teatrının özünəməxsus ifa tərzi ilə yaddaşlarda iz qoyan mərhum aktyoru Sabir Sultanovun 70 yaşı tamam olub.

Qurumun mətbuat katibi Samir Sədaqətoğlu Milli.Az-a bildirib ki, Dövlət Musiqili Teatrında Sabir Sultanovun xatirəsi anılıb və "Qızıl toy" (Ramiz Heydər, Oqtay Kazımi) tamaşasının növbəti nümayişi mərhum aktyorun 70 illiyinə həsr olunub. Tamaşanın nümayişindən öncə Musiqili Teatrın əməkdaşı, sənətşünaslıq üzrə fəlsəfə doktoru Vəfa Mühacirova S. Sultanovun həyat və yaradıcılığı haqqında çıxış edib. V. Mühacirova aktyorun oynadığı rolların hər zaman tamaşaçılar tərəfindən böyük sevgi və rəğbətlə qarşılandığını xüsusi qeyd edib. "Sabir Sultanovun "Qızıl toy" komediyasında canlandırdığı Fransız turist oğlan obrazını onun sənətinin pərəstişkarları indi də məmnunluqla xatırlayırlar. "Qızıl toy" tamaşasının bugünkü nümayişinin Sabir Sultanovun 70 illiyinə həsr olunmasının səbəbi də məhz budur", - deyə V. Mühacirova bildirib.

Qeyd edək ki, Sultanov Sabir Kərim oğlu 22 iyul 1946-cı ildə anadan olub. 1973-cü ildə İncəsənət İnstitutunun "Musiqili Komediya aktyoru" fakültəsini bitirib, 1974-cü ildə Azərbaycan Dövlət Musiqili Komediya Teatrına xor artisti vəzifəsinə qəbul edilib. Burada işgüzarlığı və zəhməti sayəsində aparıcı səhnə ustalığına qədər yüksəlib. Məlahətli səsə, güclü plastikaya və məharətli aktyorluq bacarığına malik olub. Həm rus, həm də Azərbaycan bölmələrində müxtəlif tamaşalarda əsas rolların ifaçısı olub. Sabir Sultanov klassik və müasir bəstəkarların əsərlərində bir sıra özünəməxsus obrazlar yaradıb.
Aktyor eyni zamanda "İşarəni dənizdən gözləyin", "Meyl", "Gecə qatarında qətl", "Yaşıl eynəkli adam-2", "Nigaranlıq" bədii və televiziya filimlərində müxtəlif rollarda çəkilib. Sabir Sultanov 2010-cu il 13 yanvar tarixində Bakı şəhərində vəfat edib.

Milli.Az


Tags:  Sabir Sultanovun 70 illiyi qeyd olundu

RƏYLƏR


Top news