Bakı. 5 oktyabr. REPORT.AZ/ Azərbaycan Dövlət Neft Şirkətinin (SOCAR) Heydər Əliyev adına Neft Emalı Zavodunun yenidən qurulması və modernizasiyası layihəsi çərçivəsində tikintisi nəzərdə tutulan bitum qurğusunun Ətraf Mühitə Təsirlərin Qiymətləndirilməsi (ƏMTQ) sənədi ilə əlaqədar ictimai dinləmələr keçiriləcək. Bu barədə “Report”a SOCAR-ın mətbuat xidmətindən məlumat verilib.
Dinləmələr noyabrın 2-də saat 10:00-da NEZ-in modernizasiya və yenidənqurma işləri üzrə ofis binasının böyük konfrans zalında (II mərtəbə) baş tutacaq. NEZ tərəfindən təşkil olunan tədbirdə iştirak edənlərin qeydiyyatı saat 09:30-da başlanacaq. Bütün maraqlı şəxslər tədbirdə iştirak edə bilər.
Ekologiya İdarəsi tərəfindən hazırlanmış ƏMTQ sənədinin ictimaiyyətə təqdim edilməsi üçün tanış olması üçün elektron formatda SOCAR-ın rəsmi internet səhifəsində (NEZ ƏMTQ_Faza 1.pdf), çap variantı isə NEZ-in Nizami rayonu, Oqtay Vəliyev küçəsi,1 ünvanında yerləşən kitabxanasında yerləşdirilib. Dinləmələr zamanı mütəxəssislər NEZ-də aparılan yenidənqurma və modernizasiya layihəsi, həmçinin layihə çərçivəsində tikiləcək bitum qurğusunun inşası və istismarı dövründə ətraf mühitə potensial təsirlər və onların azaldılması tədbirləri, hər bir fəaliyyət aspekti üzrə kumulyativ təsirlər, layihə alternativləri, layihə ərazisinin ilkin vəziyyəti və layihə ərazisində ətraf mühitin idarə edilməsi, eləcə də monitorinq barədə iştirakçılara ətraflı məlumat verəcəklər. İctimai dinləmədə səslənən bütün rəy və təkliflər yekun ƏMTQ sənədində nəzərə alınacaq.
Maraqlananlar H.Əliyev adına NEZ-in Əməyin təhlükəsizliyi və keyfiyyətə nəzarət departamentinin Ekologiya şöbəsinin rəisi Qiyas Bayramovla (+99412) 521 00 00 (daxili nömrə 17623) və ya (+99450) 250-89-53 (mob.) telefon nömrələri, eləcə də giyas.bayramov@socar.az e-mail adresi vasitəsi ilə əlaqə saxlaya bilərlər.
