Aktual mövzular: Dollar alış-satışı , Çempionlar Liqası, Hava haqqında, Məzənnə, Neftin qiyməti

Şeyx Kadırovun andiçmə mərasimində

Şeyx Kadırovun andiçmə mərasimində

Date: 6 October 2016 22:27

Qafqaz Müsəlmanları İdarəsinin (QMİ) sədri şeyxülislam Allahşükür Paşazadə oktyabrın 5-də Rusiya Federasiyası Çeçenistan Respublikasının paytaxtı Qroznı şəhərində səfərdə olub.
 
Milli.AzQMİ-nin saytına istinadən bildirir ki, səfər RF Çeçenistan Respublikasının başçısı seçilmiş Ramzan Kadırovun rəsmi andiçmə mərasiminə dəvət əsasında həyata keçirdi. Qafqaz müsəlmanlarının dini lideri kimi inauqurasiya mərasimində çıxış edən Şeyxülislam A. Paşazadə Azərbaycan xalqının və onun rəhbəri Zati-aliləri Prezident İlham Əliyevin təbriklərini və xoş arzularını çeçen xalqına və onun böyük səs çoxluğu ilə seçilmiş liderinə yetirdi. Öz növbəsində, cənab Ramzan Kadırovun Çeçenistan başçısı kimi fəaliyyət göstərdiyi illərdə Respublikasının həm sosial-iqtisadi, həm də mənəvi sahələrdə dirçəliş yaşadığını, Şimali Qafqazın dini-mənəvi mərkəzi kimi formalaşdığını diqqətə çatdıran QMİ sədri, R. Kadırovun bu dəfəki seçkilərdə də inamlı qələbəsini məhz xalqın və federal hökumətin inamını doğrultmuş məsuliyyətli rəhbərin fəaliyyətinə verilən yuksək qiymət, layiqli qələbə kimi səciyyələndirdi.

Qafqaz Müsəlmanları, o cümlədən Azərbaycan xalqı adından yenidən Çeçenistanın rəhbəri seçilmiş R. Kadırovu səmimi qəlbdən təbrik edən Şeyxülislam A. Paşazadə, onu, özunun qardaşı hesab etdiyi sabiq Prezident Əhməd Kadırovun siyasi və mənəvi yolunun layiqli davamçısı kimi görməkdən məmnun olduğunu, uğurlarına hər zaman sevindiyini diqqətə çatdırdı.

Rusiya Federasiyasının Qafqazdakı subyekt rəhbərlərinin də iştirak etdiyi inauqurasiya tədbirində çeçen xalqına R.Kadırovun rəhbərliyi altında yeni nailiyyətlər arzulayan QMİ sədri, Çeçenistan rəhbərini həmin günə təsadüf edən təvəllüd günü münasibətilə də təbrik edərək, ona cansağlığı və qarşıdakı fəaliyyətində daha böyük uğurlar dilədi, öz adından və bütün Qafqaz müsəlmanları adından xeyir-dua verdi.

*****

Qroznıda Şeyxülislam A. Paşazadə Şimali Qafqaz Müftilərini Əlaqələndirmə Şurasının sədri Qaraçay-Çərkəz müftisi İsmayıl Berdiyev və digər müftilərlə görüşdü. Qarşılıqlı səmimiyyət şəraitində keçən görüşdə Müfti İ.Berdiyev Şeyxülislamı Azərbaycanda bu yaxınlarda Referendumun uğurlu keçməsi münasibətilə təbrik etdi, bunu Azərbaycandakı davamlı inkişaf və sabitliyin, həmçinin ölkədə yaradılmış dövlət-din münasibətlərinin yüksək səviyyəsinin bariz nümunəsi kimi dəyərləndirdi.  Müfti İ. Berdiyev baş tutmuş Referendumun nəticələrinin Azərbaycan xalqının rifah və səadətinə xidmət edəcəyinə əmin olduqlarını bildirdi.

Şeyxülislam A. Paşazadə ölkəmizin Prezidenti İlham Əliyevin salamlarını və xoş arzularını Qafqaz müftilərinə çatdırdı. Görüşdə ümumqafqaz əhəmiyyətli dini-mənəvi məsələlərin müzakirəsi aparıldı. Şimali Qafqaz Müftilərini Əlaqələndirmə Şurasının sədri İsmayıl Berdiyev Qafqazın dini-mənəvi həyatına dair bütün məsələlərin həllində Şeyxülislam Allahşükür Paşazadənin müdrik ağsaqqal mövqeyinə hər zaman ehtiyac olduğunu xüsusi vurğuladı.

QMİ sədri Şeyxülislam A. Paşazadəni Qroznıya səfərində sədrin birinci müavini Müfti Salman Musayev müşayiət edirdi.

Milli.Az


Tags:  Şeyx Kadırovun andiçmə mərasimində

RƏYLƏR


Top news