Aktual mövzular: Dollar alış-satışı , Hava haqqında, Məzənnə, Neftin qiyməti

Azərbaycanın tənha milyonçusu... - FOTO

Azərbaycanın tənha milyonçusu... - FOTO

Date: 8 October 2016 13:27

Dünən məhkəmədə ifadəsi ilə yenidən ölkə mətbuatında manşetə çevrilən Gülağa Qəmbərov, həm də öz "Tənha"lığını xatırlatmış oldu. Beş-altı il əvvələ qədər hər gün hansısa televiziyanın ona həsr etdiyi proqrama qatılıb ölkənin görkəmli adamlarının dilindən haqqında deyilən xoş sözləri qəbul edən, şeirlərinə xalq artistlərinin bəstələdiyi qatar-qatar mahnıları dinləməyə vaxt belə tapmayan, xeyriyyəçi, ədəbiyyatçı, milyonçu və daha onlarca işdən, peşədən sorağı gələn bir adam... İndi uzun fasilədən sonra ortaya çıxan bu adamla bağlı bir-birinə zidd olan o qədər məsələ var ki... Ən böyüyü isə milyonçunun şair olması, hələ bir özünə "Tənha" təxəllüsünü götürməsidir. Adama sual verərlər ki, az qala, bütün ölkənin başına qarışqa şirəyə yığışdığı kimi yığışan bir adam niyə tənha olmalıdır ki?..

Milli.Az qafqazinfo-ya istinadən dünən məhkəmədəki ifadələri ilə media qəhrəmanına çevrilən Gülağa Qəmbərov - Tənha haqqında maraqlı məqamları təqdim edir:

Masallının məşhur Ərkivan kəndindən olan bu iş adamının Azərbaycanda, Rusiyada, İspaniyada və dünyanın bir çox ölkəsində şirkətləri var. İlk işi fəhləlik olub, sonra tikinti sahəsinə aid bir neçə yerdə işləyib, ardınca isə şəxsi biznesini qurub. Öz adına təsis etdiyi Gülağa Qəmbərov Xeyriyyəçilik Fondunun prezidentidir.

Onun şeirlərinə bəstələnən mahnıları Azərbaycanın bir çox müğənniləri, o cümlədən Flora Kərimova, Zülfiyyə Xanbabayeva, Ədalət Şükürov, Eyyub Yaqubov, Elza Seyidcahan, Baloğlan Əşrəfov, Könül Kərimova, Yalçın Rzazadə, Gülyanaq və Gülyaz Məmmədovalar, Cabbar Musayev, Səidə Sultan, Mübariz Tağıyev, Babək Niftəliyev, İlhamə Qasımova, Azər Zeynalov, Manana ifa ediblər.

G.Təhna həmçinin Şəfiqə Axundova, Eldar Mansurov, Ramiz Mirişli, Sevinc Tofiqqızı kimi məşhur bəstəkarlarla əməkdaşlıq edib. On cildlik şeirlər toplusunun, memarlıq və tikintiyə dair 5 kitabın müəllifidir. İş o yerə çatıb ki, Bəxtiyar Vahabzadə, Qabil, Fikrət Qoca və digər nəhəng ədəbiyyat adamları ayaq üstə onun şəninə sağlıqlar deyib, yaradıcılığını yüksək qiymətləndiriblər...

Hətta dünən məhkəmədəki ifadəsi zamanı yeni yazdığı şeiri demək istəsə də, hakim bu istəyinin qarşısını alıb. 
O həm də xeyriyyəçi şəxs kimi tanınıb. Ən məşhur maddi yardım olayı isə şahmat üzrə dünya çempionu Şəhriyar Məmmədyarovun bacıları Türkan və Zeynəblə bağlı olub. Bir müddət sonra 1959-cu il təvəllüdlü milyoner bu bacılardan biri, özündən 24 yaş kiçik qrossmeyster Zeynəb Məmmədyarova ilə evlənib.

Zeynəb Məmmədyarova

G.Tənhanın bəzi müsahibələri geniş yayılmasa da, indi sensasiya sayıla biləcək məlumatlarla zəngin olub. Belə ki, o hələ 2013-cü ildə hazırda ləğv edilmiş Milli Təhlükəsizlik Nazirliyini "dövlətin təhlükəsizlik qurumu yox, biznes klubu" adlandırıb. Eldar Mahmudovun qılıncının dalı-qabağı kəsən vaxtlarda bu adamı dövlətə xəyanətdə ittiham edərək, MTN şefinin ölkə başçısına qarşı çıxdığını söyləyib.

Onun xeyriyyəçiliklə bağlı elan etdiyi müsabiqəyə qatılanları "mənasız və cılız fikirli insanlar" kimi təqdim etməsi isə G. Tənhanın xarakterindəki özünəməxsusluğu açan detal hesab oluna bilər.

Milyonçu şairin özünü siyasətdə sınamaq cəhdi isə uğursuz olub. Belə ki, bir neçə dəfə parlament seçkilərinə qatılmaq istəyən Tənhanın istəyi naməlum səbəblərdən əlçatmaz olub...

Milli.Az


Tags:  Azərbaycanın tənha milyonçusu FOTO

RƏYLƏR


Top news