Bakı. 10 oktyabr. REPORT.AZ/ "Azərbaycan Dəmir Yolları" QSC və "Azərbaycan Xəzər Dəniz Gəmiçiliyi" QSC Azərbaycan üzərindən tranzit yüklərin daşınması həcminin mümkün artırılmasına dair danışıqlar aparır. Bu məqsədlə tərəflər Qazaxıstandan Azərbaycana taxıl yüklərini cəlb etmək niyyətindədir.
"Report"un məlumatına görə, bu barədə "Azərbaycan Dəmir Yolları" (ADY) QSC-nin sədri Cavid Qurbanov məlumat verib.
"Bakı-Tbilisi-Qars (BTQ) dəmir yolu açılandan sonra tranzit yüklərin əksəriyyətinin Türkiyəyə yönələcəyinə ümid edirik. Bilirsiniz ki, indi yüklərin Çindən Türkiyəyə nəqli üçün Hind okeanı vasitəsilə 12 min km yol qət etmək lazımdır. Lakin BTQ layihəsi istismara düşdükdən sonra 45 günlük həmin su yolu 12 günlük dəmir yolu ilə əvəz oluna bilər", - deyə C.Qurbanov əlavə edib.
"Və yaxud ən iri taxıl istehsalçılarından olan Qazaxıstan ildə 20 mln. tondan artıq taxıl istehsal edir. Biz həmin həcmin ən azı 2 mln. tonunu Azərbaycan üzərindən keçməsini istəyirik. Hazırda bu xidmətin hansı şəkildə reallaşa biləcəyinə dair "Azərbaycan Xəzər Dəniz Gəmiçiliyi" ilə danışıqlar aparırıq", - deyə C. Qurbanov qeyd edib.
