Aktual mövzular: Dollar alış-satışı , Hava haqqında, Məzənnə, Neftin qiyməti

Partiya sədri: “Minsk qrupu torpaqların Ermənistana verilməsi üçün hazırlanan layihədir”

Partiya sədri: “Minsk qrupu torpaqların Ermənistana verilməsi üçün hazırlanan layihədir”

Date: 10 October 2016 18:53

“ATƏT-in Minsk qrupu Azərbaycan torpaqlarını sülh yolu ilə Ermənistana vermək üçün Qərb dairələri tərəfindən hazırlanan layihədir”.

Bunu Publika.az-a açıqlamasında Azərbaycan Demokrat Partiyasının (ADP) sədri Sərdar Cəlaloğlu Prezident İlham Əliyevin “Azərbaycanı Qarabağı tanımağa məcbur etmək istəyirlər” çıxışını şərh edərkən bildirib.

S.Cəlaloğlu deyib ki, dünyada Dağlıq Qarabağ kimi yüzlərlə münaqişə mövcuddur:

“Ancaq dünyanın heç bir yerində bu cür münaqişələrlə məşğul olmaq üçün Minsk qrupuna oxşar missiya yaradılmayıb. Biz bunu nə Gürcüstan, nə Moldova, nə Qəzza, nə də Kəşmirdə baş verən münaqişələrdə görmüşük. Ancaq dünyada bu cür qrup yalnız Dağlıq Qarabağ münaqişəsi ilə bağlı yaradılıb. Burada da əsas məqsəd müharibəsiz və dinc yolla Dağlıq Qarabağı Azərbaycandan alıb Ermənistana verməkdir. Ona görə də ATƏT-in Minsk qrupunun həmsədr ölkələri münaqişə başlayandan bəri işğalçılara bütün yardımı göstərir. Fikir verin, Minsk qrupunun həmsədr dövlətlərindən olan Rusiya Ermənistana silah, ABŞ və Fransa isə maliyyə dəstəyi göstərir. Yəni, faktiki olaraq Dağlıq Qarabağda separatçılar ABŞ, Rusiya və Fransa tərəfindən edilən yardımlarla ayaqda dayanır”.

Partiya sədri qeyd edib ki, ABŞ, Rusiya və Fransa xristian dövlətləri olduğu üçün də ermənilərə dəstək göstərir:

“Əsas məqsəd müsəlman dövlətlərinin tarixi torpaqları ilə yeni erməni xristian dövləti yaratmaqdır”.

S.Cəlaloğlu vurğulayıb ki, işğalçı Ermənistana qarşı səmərəli mübarizə yolu münaqişənin həllini beynəlxalq hüquq səviyyəsinə çıxartmaqdır: “BMT-nin Azərbaycan torpaqlarının işğalı ilə bağlı ümumi qərarı var. Azərbaycan çalışıb həmin qərarı tətbiq etdirməlidir. Həmin qərar Qarabağa tətbiq olunmayana qədər, Minsk qrupu ancaq vaxtı uzatmaqla məşğuldur. Ona görə də Azərbaycan beynəlxalq hüququn tələbinə uyğun olaraq, BMT-nin ümumi qərarının tətbiq edilməsinə nail olmalı və həmin qərarla da işğalçılığa son qoyulmalıdır. Mən bunun alternativ həlli yolunu görmürəm”.

Xatırladaq ki, Prezident İlham Əliyev Nazirlər Kabinetinin ötən həftə keçirilən toplantısında çıxışı zamanı açıq şəkildə bildirib ki, bağlı qapılar arxasında keçirilən görüşlərdə Azərbaycanı Qarabağı tanımağa məcbur etmək istəyirlər.

Vasif Həsənli


Tags:  Partiya sədri Minsk qrupu torpaqların Ermənistana verilməsi hazırlanan layihədir


RƏYLƏR


Top news