Aktual mövzular: Dollar alış-satışı , İstanbulda terror, Hava haqqında, Məzənnə, Neftin qiyməti

Xətaidə yanan bina ilə bağlı şirkət əməkdaşları məhkəmədə dindirildilər

Xətaidə yanan bina ilə bağlı şirkət əməkdaşları məhkəmədə dindirildilər

Date: 11 October 2016 14:57

Bu gün Bakı Ağır Cinayətlər Məhkəməsində Xətai rayonu ərazisində çoxmərtəbəli yaşayış binasında baş vermiş yanğında təqsirləndirilən Fərid Sadıqov və Zaur Əşrəfovun cinayət işi üzrə məhkəmə prosesi keçirilib.

Milli.Az Trend-ə istinadən bildirir ki, hakim Eldar İsmayılovun sədrliyi ilə keçirilən prosesdə şahid qismində ifadə verən Rəşad Quliyev bildirib ki, "TNH" şirkətində dizayner işləyib: "İşə təqsirləndirilən Fərid Sadıqov tərəfindən götürülmüşəm. Aylıq əmək haqqım 2 min manat olub. Biz binaların necə üzlənməsini, vizual görünüşü ilə bağlı dizaynı bir neçə formada hazırlayaraq şirkət rəhbərinə təqdim edirdik. Qərarı onlar verirdilər. Bizdə mütəxəssis yox idi. Hamı həvəskar dizayner kimi işləyirdi. Biz dizaynları hazırlayırdıq və ölçüləri müəyyən edirdik. Binalar üzlənərkən dizayner qrupu da orada olurdu. Amma onlar binalarda dizayn işləri ilə yaranacaq problemlərə nəzarət edirdilər. Təhlükəsizliyə isə sahə rəisləri və yanğınsöndürmə xidmətinin əməkdaşları nəzarət edirdilər. Onlar da şirkətin əməkdaşları idilər".

R.Quliyev qeyd edib ki, binanın divarı ilə üzlüyün arasında olan məsafə problemli olub: "Bu işlərə isə dizayner qrupu nəzarət etməyib. Layihənin smeta layihəsi digər təqsirləndirilən və hazırda vəfat etmiş Nüsrət Muxtarov və onun şirkəti tərəfindən təsdiqlənib. Şirkətdə bütün işlərə Məmməd Vəliyev və onun bacısı oğlu, Nüsrət Muxtarov nəzarət edirdi. Mən isə rəhbər olaraq Fərid Sadıqovu tanıyırdım".

Sonra ifadə verən şirkətin mühasibi Məsim Quliyev bildirib ki, 2011-ci ildə işə düzəlmək üçün "TNH" şirkətinə müraciət edib: "Əvvəlcə 3 ay sınaq müddətində işləmişəm. Bu müddət ərzində verilən tapşırıqları yerinə yetirmişəm. Rəhbər olaraq Məmməd Vəliyevi tanımışam".

Məhkəmə iclası oktyabrın 18-də davam edəcək. Qeyd edək ki, iyulun 19-na təyin edilmiş proses təqsirləndirilən şəxs Nüsrət Muxtarovun vəfatı ilə bağlı baş tutmamışdı. Buna səbəb Nüsrət Muxtarovun cinayət işi üzrə hüquqi varisinin müəyyən edilməməsi olub. Hüquqi varis Nüsrət Muxtarov tərəfindən ödənilməli olan dəymiş ziyanı qarşılayacaq. Nüsrət Muxtarov iyulun 13-də saxlanıldığı Bakı İstintaq Təcridxanasında vəfat edib. İyulun 26-da keçirilən prosesdə dünyasını dəyişən Nüsrət Muxtarovun oğlu Asif Muxtarov onun hüquqi varisi kimi tanınıb.

İttihama görə, yanğın hadisəsi ötən il aprelin 10-da Bakının Xətai rayonu, Zığ yolu,16 ünvanda baş verib. Həmin ünvanda "TNH" şirkəti tərəfindən doqquzmərtəbəli yaşayış binasının fasadının poliuretan materialla üzlənməsi ağır nəticələrə səbəb olan yanğınla nəticələnib. Bu hadisədən sonra Fərid Sadıqov, Zaur Əşrəfov və Nüsrət Muxtarov həbs olunublar.

Milli.Az


Tags:  Xətaidə yanan bina bağlı şirkət əməkdaşları məhkəmədə dindirildilər

RƏYLƏR


Top news