Aktual mövzular: Dollar alış-satışı , Hava haqqında, Qarabağ, Qəbələ, Məzənnə, Neftin qiyməti

Draqana Filipoviç: “Azərbaycan hökuməti demokratiya sahəsində iradə ortaya qoyub”

Draqana Filipoviç: “Azərbaycan hökuməti demokratiya sahəsində iradə ortaya qoyub”

Date: 13 October 2016 16:03

Bu gün Bakıda Avropa Şurası və Avropa İttifaqı tərəfindən Şərq Tərəfdaşlığı ölkələri, xüsusən Azərbaycan üçün nəzərdə tutulmuş layihələrin orta müddətli hesabatının təqdimat mərasimi keçirilib.

Publika.az xəbər verir ki, tədbirdə Avropa Şurasının Bakıdakı ofisinin rəhbəri Draqana Filipoviç, Avropa İttifaqının Azərbaycandakı Nümayəndəliyinin rəhbəri, səfir Malena Mard, Azərbaycan Mətbuat Şurasının sədri, millət vəkili Əflatun Amaşov, Azərbaycanın Xarici İşlər Nazirliyinin məsul nümayəndəsi Aqil Günəşov, media təmçilçiləri və hüquqşünaslar iştirak edir.

Avropa Şurasının Bakıdakı ofisinin rəhbəri Draqana Filipoviç deyib ki, Azərbaycanda 2015-2017-ci illərdə Proqram Əməkdaşlığı Çərçivəsində keçiriləcək dörd layihənin əsas məqsədi KİV və ifadə azadlığının genişləndirilməsi, inzibati orqanlarda rüşvətxorluqla mübarizə və rüşvətxorluğun qarşısını alma imkanlarının gücləndirilməsi, Ədliyyə Akademiyasının rolunun və imkanlarının artırılması, hakimlərə təhsil verilməsi, habelə Azərbaycanda ədliyyə xidmətlərinin səmərəsi və keyfiyyətinin yüksəldilməsindən ibarətdir. Onun sözlərinə görə, 4,7 milyon avro dəyərində olan bu layihələr Avropa İttifaqı və Avropa Şurası tərəfindən maliyyələşdirilir:

“Sözügedən layihələr Avropa Şurası tərəfindən həyata keçirilir. Ölkəyə aid olan bu layihələrin nəticələrindən əlavə, həm də Azərbaycanın iştirak etdiyi bütün Şərq Tərəfdaşlığı ölkələrini əhatə edən 14 regional təşəbbüsün nəticələri təqdim olunacaq. Azərbaycana ayrılan 4,7 milyon avro vəsait 4 layihə üzrə həyata keçiriləcək”.

Draqana Filipoviç qeyd edib ki, Azərbaycan hökuməti insan hüquqları, korrupsiya ilə mübarizə və demokratiya sahəsində iradə ortaya qoyub:

“Bu layihələrin icrası Azərbaycan hökumətinin əməkdaşlığı olmadan mümkün olmazdı. Buna görə Azərbaycana təşəkkür edirəm”.

Səfir Malena Mard artıq 25 ildir ki, təmsil olunduğu təşkilatın Azərbaycanda fəaliyyət göstərdiyini söyləyib:

“Bu illər ərzində bir sıra irəliləyişlər əldə olunub. Korrupsiya ilə mübarizə sahəsində bərabər işləməliyik. Avropa İttifaqı Azərbaycanda vətəndaş cəmiyyətinin, ədalətli məhkəmənin və müstəqil medianın qurulmasında maraqlıdır. Bu məqsədlə də Azərbaycana dəstək verilir. Bu dəstək gələcəkdə də davam etdiriləcək. əsas məqsədimiz odur ki, Azərbaycan hökuməti ilə əməkdaşlığımız davam etdirilsin”.

Hazırda tədbir çıxışlarla davam edir.

Vasif Həsənli


Tags:  Draqana Filipoviç Azərbaycan hökuməti demokratiya sahəsində iradə ortaya qoyub

RƏYLƏR


Top news