Kollektiv Təhlükəsizlik Müqaviləsi Təşkilatının (KTMT)
İrəvanda keçirilən iclası Belarus prezidenti Aleksandr Lukaşenkonun
iradı ilə yadda qaldı.
Publika.az xəbər verir ki, Lukaşenko “xırda məsələlərə
görə onu İrəvana gətirdikləri” üçün etiraz edib və KTMT-nin dünya
səviyyəsində qəbul edilmədiyindən şikayətlənib.
“Qrabarak” qəzeti isə Lukaşenkonun iclas başa çatandan sonra
Ermənistanı tərk etmədiyi haqda məlumat yayıb.
“İclas başa çatandan sonra bütün prezidentlər Ermənistanı tərk etsə
də, Lukaşenko İrəvanda qalıb və bir gün sonra ölkəsinə qayıdıb”, -
deyə qəzet yazıb.
Məlumata görə, Lukaşenkonun Ermənistanda bir gün artıq qalmasının
səbəbi biznesmen Qaqik Sarukyanla görüşməsi olub: “Belarus
prezidenti Sarukyanla görüşüb, həmçinin, onun atasını da ziyarət
edib”.
Sarukyanın mətbuat katibi İvet Tonoyan isə Lukaşenkonun
Ermənistanda bir gün əlavə qalmadığını bildirib.
“Belarus prezidenti KTMT-nin iclası günü Sarukyanın qonağı oldu və
həmin gün də Ermənistandan getdi”, - deyə mətbuat katibi
vurğulayıb.
Qeyd edək ki, Q. Sarukyan Serj Sarkisyanın rəqibidir. Vaxtilə qatı
müxalifətdə olan Sarukyan sonradan yumşaq mövqe sərgiləməyə
başlayıb. Lakin Sarkisyan Sarukyanın kürəkəni olan keçmiş baş nazir
Ovik Abramyanı vəzifəsindən uzaqlaşdırandan sonra aralarında ciddi
narazılıq yaranıb. Lukaşenkonun Sarukyanla xüsusi görüşməsi bu
kontekstdə diqqət çəkir.
Asif