"Ayaz Mütəllibov Azərbaycana ermənilər qədər ağır zərbələr vurub. Bunu tarix də sübut edəcək".
Milli.Az bildirir ki, bu fikirləri publika.az-a açıqlamasında Ana Vətən Partiyasının (AVP) sədri, Milli Məclisin deputatı Fəzail Ağamalı Azərbaycanın Dövlət Müstəqilliyinin 25 illiyi ilə bağlı danışarkən deyib.
Deputat deyib ki, Ayaz Mütəllibovun ən böyük səhvi bacarmadığı işin altına girməsi olub:
"Ulu öndər Heydər Əliyevin sayəsində yüksək vəzifələrə qalxan Ayaz Mütəllibov nəinki reallığını itirmişdi, hətta Heydər Əliyevə qarşı da böyük nankorluq nümayiş etdirirdi. O, Heydər Əliyevin Azərbaycana gəlişinə ciddi şəkildə əngəllər törədirdi. Sonrakı illərdə isə Ayaz Mütəllibov bir neçə dəfə ulu öndər Heydər Əliyevin həyatına sui-qəsd təşkil etdirməkdən belə çəkinmədi. İndi də Ayaz Mütəllibov gəlib Bakıda rahat şəkildə oturub, hələ utanmadan Azərbaycanın dövlət müstəqilliyinin bəhrələrindən istifadə edir. Bu gün Ayaz Mütəllibov Azərbaycanda keçmiş prezident kimi dövlət tərəfindən yüksək şəraitlə təmin olunub. Halbuki, Ayaz Mütəllibov buna zərrə qədər layiq deyil. Vaxtilə bu məsələ gündəmə gələn zaman da mən Milli Məclisdə sonadək bunun əleyhinə çıxış etmişəm. O, buna layiq adam deyil, Ayaz Mütəllibovun buna mənəvi haqqı çatmır. O, Azərbaycana ermənilər qədər ağır zərbələr vurub".
F.Ağamalı prezident İlham Əliyevin ötən gün Azərbaycanın dövlət müstəqilliyinin bərpasının 25-ci ildönümünə həsr olunan rəsmi qəbuldakı çıxışına da toxunub:
"Ölkə prezidenti İlham Əliyev ötən gün çıxışı zamanı da çox doğru vurğulayıb. Yəni, Azərbaycan xalqı zamanında nə qədər çətin olsa belə ən müxtəlif yollarla ulu öndər Heydər Əliyevi Azərbaycana gətirib, hakimiyyəti ona versəydi, o zaman ölkəmiz daha tez müstəqillik qazanardı. Ən başlıcası isə indi işğal altında olan torpaqları itirməzdik. Tam məsuliyyətlə deyirəm ki, əgər Heydər Əliyev 1990-cu ilin 20 Yanvar faciəsindən dərhal sonra Azərbaycanda hakimiyyətə gəlsəydi, o zaman bizim bir qarış torpağımız belə işğal olunmazdı. Necə oldu ki, həmin dövrdə Ermənistan bütün gücü ilə Naxçıvana hücum etsə də, ancaq bir qarış torpağı işğal edə bilmədi? Çünki həmin vaxtı Heydər Əliyev Naxçıvanda idi və torpaqların qorunması üçün fədakarlıq göstərirdi".
Deputat qeyd edib ki, həmin vaxtı AXCP-Müsavat hakimiyyəti Heydər Əliyevə Bakıya gəlməyə imkan vermirdi:
"Mən həmin vaxtı Naxçıvanda olan zaman "Əlincə" qəzetinə müsahibəmdə də demişdim ki, Heydər Əliyevin Naxçıvan Ali Məclisinə sədr seçilməsi Ermənistanın Naxçıvanı işğal etmək planlarını puç edəcək və ermənilər bir qarış torpaq ala bilməyəcəklər. Təbii ki, həmin dövrdə Heydər Əliyev fenomeni, iradəsi, zəkası və təcrübəsi Naxçıvanı Ermənistanın hərbi təcavüzündən azad etdi. Halbuki, Heydər Əliyev gələnə qədər ermənilər Sədərəkədək tutmuşdular. Biz bu situasiyanı bütövlükdə Azərbaycanda da yarada bilərdik. Bunun üçün xalq ayağa qalxmışdı və Heydər Əliyevi tələb edirdi. Heydər Əliyevi tələb edən çoxsaylı insanlar içərisində mən də var idim. Azərbaycan Xalq Hərəkatının böyük qanadı Heydər Əliyevin yanında idi. Çox təəssüf ki, Ayaz Mütəllibov, daha sonra isə AXCP-Müsavat hakimiyyəti Heydər Əliyev fenomenindən qorxub çəkinərək, onun siyasi arenaya gəlməsinə mane olmağa çalışırdı və müəyyən vaxtadək mane oldular. Ona görə də Azərbaycanda xoşagəlməz hadisələr baş verdi. Bütün bunlar tarixdir və tarixi olduğu kimi yazmaq lazımdır. Ötən əsrin 90-cı illərinin əvvəllərində Ayaz Mütəllibov, AXCP və Müsavat hakimiyyətlərinin Azərbaycana rəhbərlik etməsi, prezidentin dediyi kimi, həqiqətən bu gün tarixin zibilliyindədir. Onlar tarixin yaddaşına düşə bilməyiblər. Bu faktları gələcək nəsil bilməlidir. Tariximiz olduğu kimi yazılmalıdır ki, gələcək nəsillər bundan müsbət nəticə çıxarda bilsin və bu cür tiplərin Azərbaycanda hakimiyyətə gəlməsinə bir daha imkan verilməsin".
F.Ağamalı həmçinin vurğulayıb ki, 18 oktyabr Dövlət Müstəqillik Günü Azərbaycan tarixinin ən şərəfli və qızıl hərflərlə yazılmış səhifələrindən biridir:
"Ötən əsrin 80-ci illərinin sonu, 90-cı illərinin əvvəllərində keçmiş SSRİ məkanında baş verən qarşıdurmalar və Azərbaycanda gedən siyasi proseslər müstəqil dövlətin yaranması üçün ilkin və əsaslı şərait yaradırdı.
Ötən gün prezident İlham Əliyevin Azərbaycanın Dövlət Müstəqilliyinin 25 illiyinə həsr olunan mərasimdə çıxışı zamanı "Azərbaycan xalqı dövlət müstəqilliyinə daha tez nail ola bilərdi" söyləməsi tam haqlı fikirlərdir. O zaman Azərbaycanın Dövlət Müstəqilliyi Aktı daha tez qəbul edilə bilərdi. Ancaq bu mümkün olmadı. Azərbaycan keçmiş 15 SSRİ respublikaları arasından sondan üçüncü yerdə dayanırdı. Halbuki, həmin illərdə Azərbaycan SSRİ-nin dağılmasında çox ciddi faktor idi. O dövrdə Azərbaycanda gedən siyasi proseslər, xüsusilə də xalq hərəkatı və 1990-cu ilin 20 Yanvar hadisəsindən sonra bu hərəkatın Milli Azadlıq Hərəkatına keçidi SSRİ-nin çökməsində mühüm rol oynayıb və digər SSRİ üzvü olan respublikalarda da xalq hərəkatının yaranmasına təkan verib. Çox təəssüf ki, həmin dövrdə Kremldən asılı olan, Azərbaycan xalqı ilə bir yerdə olmayan və uzaqgörənlik nümayiş etdirməyən Ayaz Mütəllibov və onun komandası xalqımızın iradəsini ifadə edə və SSRİ məkanında gedən proseslərin nəticəsini qiymətləndirə bilmirdi. Bunun nəticəsində isə bu gün Rusiyanın forpostu olan Ermənistan belə Azərbaycandan öncə müstəqilliyini elan edib. Ona görə Ayaz Mütəllibovun Azərbaycana xalqına vurmuş olduğu zərbələri bu gün bağışlamaq olmur. O, hakimiyyətdə olduğu dövrdə Azərbaycan xalqına qarşı çox aşağılayıcı hərəkətlərə yol vermişdi".
Milli.Az
