Elxan Əsədov: "Azərbaycanın tikinti sektorunu böyük ınkişaf gözləyir"

Elxan Əsədov: "Azərbaycanın tikinti sektorunu böyük ınkişaf gözləyir"
13:22 19 Oktyabr 2016
Ölkə mətbuatı
A- A+

Bakı. 19 oktyabr. REPORT.AZ/ "Dövlət başçısı İlham Əliyevin ardıcıl fəaliyyəti nəticəsində Azərbaycanın işğalda olan torpaqlarının azad olunması üçün böyük ümidlər yaranıb. Qarşıdakı illərdə Azərbaycanın işğaldan azad olunacaq torpaqlarının da bərpası üzrə inşaatçıları böyük işlər gözləyir".
"Report" xəbər verir ki, bunu bu gün Bakıda işə başlayan XXII Beynəlxalq İnşaat Sərgisinin açılış mərasimində Fövqəladə Hallar Nazirliyi yanında Tikintidə Təhlükəsizliyə Nəzarət Dövlət Agentliyinin rəis müavini Elxan Əsədov bildirib. 
"Prezident İlham Əliyevin də qeyd etdiyi kimi, dünya iqtisadi böhranına baxmayaraq, Azərbaycanda sosial sahələrdə dövlət investisiyaları azaldılmayacaq. Bunları nəzərə alaraq Azərbaycanda qarşıdakı illərdə tikinti sektorunu böyük ınkişaf gözləyir. Buna görə də yerli və xarici şirkətləri gələcək işlərə indidən hazırlaşmağı tövsiyə edirəm. Məsələ burasındadır ki, yeni ərazilərin azad edilməsi, sosial yaşayışın, infrastrukturun yaradılması, sosial evlərin tikilməsi böyük iqtisadi məsələdir və əsasən sosial məqsədlərə yönəldiyindən daha ucuz inşaat materialları və texnologiyalarından istifadə etmək tələb olunur", - deyə o, qeyd edib. 
E.Əsədov yerli şirkətləri daha fəal olmağa və daxili bazarın xarici idxaldan asılıqdan azalmağa səsləyib. 
Qeyd edək ki, 26 ölkədən təxminən 300 şirkətin qatıldığı Beynəlxalq İnşaat Sərgisi oktyabrın 22-dək davam edəcək.

Xəbərin orijinal ünvanı: http://report.az/i-nfrastruktur/elxan-esedov-azerbaycanin-tikinti-sektorunu-boyuk-inkisaf-gozleyir

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR