Aktual mövzular: Dollar alış-satışı , Hava haqqında, Məzənnə, Neftin qiyməti

Döyülərək başı qırxılan qadının övladları uşaq evinə yerləşdiriləcək - FOTO

Döyülərək başı qırxılan qadının övladları uşaq evinə yerləşdiriləcək - FOTO

Date: 20 October 2016 16:17

Sumqayıtda həyat yoldaşı tərəfindən dəhşətli işgəncələrə məruz qalan, başı qırxılaraq təhqir edilən 1982-ci il təvəllüdlü Münəvvər Qəzənfər qızı Abbasovanın övladları uşaq müəssisəsinə yerləşdiriləcəklər.

Milli.Az bildirir ki, bu barədə virtualaz.org saytına "Təmiz Dünya" Qadınlara Yardım İctimai Təşkilatının sədri Mehriban Zeynalova məlumat verib.

Hüquq müdafiəçisi deyib ki, hazırda qadın və övladları təşkilatın sığınacaq evində məskunlaşıblar. "Sumqayıt Şəhər İcra Hakimiyyətinin köməyi ilə uşaqları sığınacağa gətirmişik. İcra hakimiyyəti uşaqların sənədlərini hazırlayır. Azyaşlılar geyim və dərs ləvazimatları olmadığından məktəbə gedə bilməyiblər. Ana evdən qaçandan sonra uşaqlar nəzarətsiz qalıblar", - M.Zeynalova əlavə edib.

Təşkilat Təhsil Nazirliyinə müraciət edib. Nazirlik uşaqları internat evi və ya uşaq müəssisələrinə yerləşdirəcək. "Uşaqların təhsil alması vacibdir. Onların hansı müəssisəyə yerləşdirilməsi məsələsinə nazirlik qərar verəcək. Münəvvərin böyük oğlu 11 yaşlı Kamal və qızı 7 yaşlı Əminə Hacızadə məktəbə getmir. Mehribanın 5, Muxtarın isə 3 yaşı var. Ana istədiyi vaxt uşaqlarını görə biləcək", - Zeynalova söyləyib.

Qeyd edək ki, ailə münaqişəli ailə kimi Sumqayıt Şəhər Polis İdarəsində qeydiyyatda olub. Münəvvər Abbasovanın həyat yoldaşı Ümid Hacıyev saxlanılıb. Ona qarşı Cinayət Məcəlləsinin 133-cü maddəsi ilə cinayət işi açılıb. Hazırda istintaq gedir.

Xatırladaq ki, qadının həyat hekayəsi virtualaz.org saytında işıqlandırılandan sonra ailə nəzarətə götürülüb.

Milli.Az



Tags:  Döyülərək başı qırxılan qadının övladları uşaq evinə yerləşdiriləcək FOTO

RƏYLƏR


Top news