Milli.Az bildirir ki, xalq artisti Arif Quliyev unikal.org-a müsahibə verib.
O, söhbətində başına gələn maraqlı hadisələrdən də danışıb. Müsahibəni təqdim edirik:
- Arif müəllim, həyat yoldaşınızın səhhəti ilə bağlı danışardınız....
- Həyat yoldaşım möhkəm xəstədir. Sözün həqiqi mənasında, başımı itirmişəm. Çünki həyat yoldaşım elə bir xəstəliyə tutulub ki, bu, gündəlik qayğı, böyük narahatçılıq, bahalı dərmanlar tələb edir. Amma yavaş-yavaş yola veririk. Allahın köməkliyi ilə həyat yoldaşım sağalacaq. 1 il 4 ay bundan əvvəl də özüm beyin əməliyyatı keçirtmişəm. Türkiyədə baş tutan bu ağır əməliyyat üçün mənə cənab prezident İlham Əliyev köməklik edib. Prezident mənim müalicəmə bir dəfə kömək edib. İndi yoladşımın müalicəsi üçün yenidən prezidentə müraciət etməyə üzüm gəlmir. Utanıram. Heç kimin mənə borcu yoxdur. Ola bilsin kiminsə ürəyi istəyər, imkanı olar ailəmin xəstəliyinə köməklik edər. Amma mən dilənçi deyiləm ki, kimə gəldi ağız açım.
- Bəs bu məsələyə görə jurnalistlərdən niyə narazısız?
- Müayinə üçün hansısa xəstəxanaya gedirəm. Biri məni xəstəxanada görən kimi, jurnalistlərə o saat xəbər edir, sayt və qəzetlərdə yazırlar ki, Arifi "nasılka"da xəstəxanaya gətirdilər. Yəni mənim barəmdə şişirdilmiş "xəbərlər" yayırlar. Bu, məni narahat edir. Arif dəmirdən deyil ki? Mən də insanam, arada səhətimlə bağlı narahatçılığım ola bilər və mən bunun üçün xəstəxanaya müayinəyə gedə bilərəm. Hər birimizi Allah yaradıb. İnsan xəstə, sağlam da ola bilər, toya da, yasa da gedə bilər. Bu, məni çox narahat edir. Bir yerə gedən kimi barəmdə şişirdilmiş məlumatlar yayılır.
- Bir müddət əvvəl demişdiniz ki, konsertlər vermək və buradan yığılan pulla həyat yoldaşınızı müayinə etmək istəyirsiniz...
- Görək də hazırlaşıram. İstəyirəm proqram hazırlayım və rayonlarda konsertlər təşkil edim. Rusiyada da bir neçə dostum var. Onlar məni çağırırlar. Təklif edirlər ki, gedib konsert verim. Mən səhhətimlə bağlı təyyarəyə minə bilmirəm. Gərək qatarla gedim.
- Təyyarəyə minə bilməməyinizin səbəbi nədir?
- Təyyarədən və liftdən qorxuram. Təyyarədə olduğum zaman iki dəfə qəza vəziyyəti yaranıb. Bundan sonra təyyarə ilə səyahət edə bilmirəm. 15 il bundan əvvəl Astarxana uçaqla gedəndə qəza enişi etdi. Çox böyük stress keçirdik. Təyyarə eniş edərkən təkəri açılmadı, 40 dəqiqə dənizin üstündə fırlandı. Bir dəfə də Krosnoyarskiyə gedəndə qapılar açılmadı. İnsanların nəfəsi təyyarənin içində daralırdı. O vaxtdan beynimdə ağrılar başladı. Nəfəs ala bilmirdik və zorla qapıları açdılar. Bayıra xərəkdə çıxarıldıq. Liftdə isə üç dəfə ilişib qalmışam. Bir dəfə liftdə axşam saat 2-dən səhər saat 8-ə qədər gecəni liftdə keçirmişəm. Ona görə də, təyyarəyə və liftə qarşı qorxum var. Sankt-Peterburqda bir dostum yaşayır. Məni müalicə olunmağım üçün ora dəvət edir. Deyir, nə lazımdırsa köməklik edəcək. Amma qarşıma 1 milyon da qoysan, mən təyyarəyə minmərəm. Düz 15 ilə yaxındır ki, təyyarədən istifadə etmirəm.
- Seriallara çəkilmək üçün dəvət alırsınızmı?
- Əvvələr məni dəvət edirdilər. Amma son illər dəvət almıram. Komediya janrında çəkilən serial yoxdur. Ola bilsin bu səbəbdən dəvət olunmuram. Hər serialda Arif Quliyev ola bilməz ki? Hansı kinoya, verilişə məsləhətəmsə gedirəm. Son illər dəvət almamağımın səbəbini mənə uyğun obrazın olmamasında görürəm. Əgər uyğun olsa, rejissor məni dəvət edər. Bir dəfə Elməddin məni "Qız atası" serialında çəkilməyə dəvət etdi. Getdim çəkildim.
- Son zamanlar çəkilən serialları necə qiymətləndirirsiniz?
- "Seriallarımız çox gözəldir. Dəyərlidir. Süjetləri, aktyor seçimləri əladır. Bizim gənc rejissorlarımızın adını bilməsəm də, amma çox çalışqandırlar. Azərbaycanda seriallar məni qane edir". Sən jurnalist olaraq öz yazınla çıxış et. Məni danışdırıb "qane deyil" sözünü almaq istəyirsənsə, bu mümkün deyil. Yazmaq, ictimailəşdirmək imkanı səndədir. Nöqsanları sən yazmalı və sən deməlisən. Mən isə demirəm.
- Axı bu sahənin peşəkar insanı sizlərsiniz. Niyə siz danışmayasınız?
- Mən danışmıram. Hər şeydən razıyam. Başqa aktyoru çağır, ona belə suallar ver. Məni istəyən adam "intriquyuşi" sual verməz. Sən məni qonaq çağırmısan. Mən də gəlmişəm. Bir stəkan çayımı içib, indi isə sağollaşıram.
Milli.Az
