Aktual mövzular: Dollar alış-satışı , Hava haqqında, Məzənnə, Neftin qiyməti

Belarusda keçiriləcək II Avropa Oyunlarının büdcəsi "Bakı 2015"lə müqayisədə xeyli az olacaq

Belarusda keçiriləcək II Avropa Oyunlarının büdcəsi "Bakı 2015"lə müqayisədə xeyli az olacaq

Date: 21 October 2016 23:47

Bakı. 21 oktyabr. REPORT.AZ/ 2019-cu ilin yayında Belarusda keçiriləcək II Avropa Oyunlarının büdcəsi "Bakı 2015"lə müqayisə olunmaz dərəcədə aşağı olacaq.
"Report"un məlumatına görə, bu barədə TASS-a ölkənin idman və turizm naziri Aleksandr Şamko açıqlama verib.
O bildirib ki, Azərbaycanın Avropa Oyunları keçirmək üçün fərqli konsepsiyası olub: "Bakı iki dəfə Yay Olimpiya Oyunlarına iddiaçı olub. Ona görə də şəhərdə tikinti qlobal, büdcə isə çox böyük olub. Bizdə isə hazırda, demək olar ki, hər şey hazırdır. Bu üzdən, Azərbaycanın çəkdiyi xərclərdən müqayisə olunmaz dərəcədə aşağı məbləğdə vəsait sərf edəcəyik".
Şamko Oyunların təkcə paytaxt Minskdə deyil, Belarusun bir neçə şəhərində keçirilməsinin mümkünlüyünü də vurğulayıb: "Bizim təkcə paytaxtda deyil, bir neçə regionda da müasir idman infrastrukturumuz yaradılıb. İndidən Oyunların konkret hansı şəhərlərdə keçiriləcəyindən danışmaq tezdir. Biz idman növləri üzrə 10-12 istiqaməti qeyd etmişik. Mümkündür ki, hansısa yarışlar Minskdə keçirilməsin. Yekun qərar Təşkilat Komitəsinin hərtərəfli işə başlamasından sonra veriləcək".
Hökumət rəsmisi Avropa Oyunlarını keçirərkən, Rusiyanın böyük yarışlara zəngin təşkilatçılıq təcrübəsindən yararlanacağını açıqlayıb. Nazir eyni zamanda, ilk Avropa Oyunlarını keçirmiş Azərbaycanın təcrübəsinin də vacibliyini dilə gətirib.
Belarus Milli Olimpiya Komitəsinin (MOK) I vitse-prezidenti Maksim Rıjenkov isə idman növlərinin sayının "Bakı 2015"dəki kimi 20 deyil, 12 - 15 aralığında olacağını açıqlayıb. Rıjenkovun sözlərinə görə, həmin növlərin adları Belarusun və Avropa Olimpiya Komitələrinin konseptual maraqlarına, Minsk və onun ətrafındakı infrastruktura əsasən müəyyənləşəcək. İdman növlərindən çoxu üzrə yarışlar 2020-ci il Tokio Yay Olimpiya Oyunlarına lisenziya xarakterli olacaq.
Rıjenkov Avropa Olimpiya Komitələri və Beynəlxalq Olimpiya Komitəsi ilə birgə marketinq proqramı hazırlayacaqlarını da söyləyib. Həmin proqrama əsasən, görüləcək işlərdən, biletlərdən gəlirlərin böyük hissəsi harasa bölünməyə yox, Oyunlara çəkilən xərclərin qarşılanmasına sərf olunacaq. MOK rəsmisi, həmçinin nəqliyyat təminatı, idmançıların daşınması kimi çox ciddi məbləğdə xərclərin bir hissəsini, teleyayım hüququnun satışı, reklam və s.-i EOC-un öz üzərinə götürməyə hazır olduğunu bildirib.
II Avropa Oyunlarının iştirakçıları isə "Bakı 2015"dəki kimi 10 min yox, 4-5 min civarında olacaq. Onların Minskdəki Tələbə Şəhərciyində yerləşdirilməsi planlaşdırılır. Rıjenkov bu addımın da təşkilati işlər zamanı əhəmiyyətli dərəcədə qənaətə yol açacağını vurğulayıb.
Qeyd edək ki, "Bakı 2015" I Avropa Oyunlarının büdcəsi, rəsmi rəqəmlərə əsasən, 1,2 milyard dollar olub. Ötən ilin iyununda keçirilmiş Oyunlarda yalnız kayak və kanoe yarışları Bakıda deyil, paytaxtdan 275 km aralıdakı Mingəçevirdə təşkil olunub.

Tags:  Belarusda keçiriləcək II Avropa Oyunlarının büdcəsi Bakı 2015lə müqayisədə xeyli az olacaq


RƏYLƏR


Top news