Aktual mövzular: Dollar alış-satışı , Hava haqqında, Məzənnə, Neftin qiyməti

Prokuror "Qızıl Məryəm"in qatillərinə 49 il cəza istədi

Prokuror "Qızıl Məryəm"in qatillərinə 49 il cəza istədi

Date: 24 October 2016 17:47

Bu gün Bakı Ağır Cinayətlər Məhkəməsində Bakıda "Qızıl Məryəm" kimi tanınan Məryəm Nemətzadənin qətlində təqsirləndirilən qızı Günel Hüseynova, onun xalası oğlu Nicat Eyvazov və Ceyhun Əsgərovun cinayət işi üzrə məhkəmə prosesi davam edib.

Milli.Az Trend-ə istinadən bildirir ki, hakim Eynulla Vəliyevin sədrliyi ilə keçirilən prosesdə məhkəmə istintaqı başa çatıb. Prokuror çıxışında Günel Hüseynovanın 19 il, Nicat Eyvazovun 10 il, Ceyhun Əsgərovun 20 il azadlıqdan məhrum edilməsini istəyib. Məhkəmə prosesi oktyabrın 28-i davam edəcək.

İttihama görə, bu il yanvarın 5-də, saat 09.00 radələrində 1965-ci il təvəllüdlü Məryəm Nemətzadənin yaşadığı mənzildə üzərində çoxsaylı kəsilmiş-deşilmiş xəsarətlər olan meyidi aşkar edilib. Daxil olmuş məlumat əsasında polis və prokurorluq əməkdaşları məhkəmə-tibb ekspertin iştirakı ilə hadisə yerinə və meyidə baxış keçirib. Əməliyyat-axtarış tədbirləri nəticəsində cinayətin mərhumun qızı, 1988-ci il təvəllüdlü Günel Hüseynova, bacısı oğlu, 1998-ci il təvəllüdlü Nicat Eyvazov və 1997-ci il təvəllüdlü Ceyhun Əsgərov tərəfindən törədilməsində əsaslı şübhələr meydana çıxıb və onlar tutularaq istintaqa cəlb olunublar. Təqsirləndirilən şəxslər Cinayət Məcəlləsinin 120.2.4, 120.2.11 (quldurluqla əlaqədar xüsusi amansızlıqla qəsdən adam öldürmə) və 181.3.3-cü (quldurluq, zərərçəkmiş şəxsin sağlamlığına ağır zərər vurulmaqla törədildikdə) maddələri ilə ittiham edilirlər.

Milli.Az


Tags:  Prokuror Qızıl Məryəmin qatillərinə 49 il cəza istədi

RƏYLƏR


Top news