Aktual mövzular: Dollar alış-satışı , Hava haqqında, Məzənnə, Neftin qiyməti

Mehriban Hüseynovanın məhkəməsində şahid ifadə verib: "Onu İlhamə Quliyeva bıçaqlamışdı"

Mehriban Hüseynovanın məhkəməsində şahid ifadə verib: "Onu İlhamə Quliyeva bıçaqlamışdı"

Date: 25 October 2016 13:57

Bakı. 25 oktyabr. REPORT.AZ/ Bu gün Bakı Ağır Cinayətlər Məhkəməsində mərhum xalq artisti İlhamə Quliyevanın sabiq köməkçisi Mehriban Hüseynovanın cinayət işi üzrə məhkəmə prosesi davam etdirilib.
"Report"un məlumatına görə, hakim Səbuhi Hüseynovun sədrliyi ilə keçirilən prosesdə şahid Xatirə Ramazanova ifadə verib.
Onun sözlərinə görə, təqsirləndirilən M.Hüseynova ona zəng edib və evinə gəlməsini istəyib: "Mehriban dedi ki, İhamə Quliyevanın evində çantası əlindən alınıb, pulu götürülübvə ona qarşı alçaldıcı hərəkətlər edilib. Bu hadisədən əvvəl də Mehribanın başına iş gəlmişdi. Onlar gedəndə Mehribanın bıçaqlandığını gördüm. Mehriban bildirdi ki, onu İlhamə Quliyeva bıçaqlayıb. Hadisəni eşidəndə şokda idim".
X.Ramazanova qeyd edib ki, M.Hüseynova ilə birlikdə onun rəfiqəsindən pul götürməyə gediblər: "Geri qayıdanda Mehribanın evinin qarşısında qara rəngli maşın qabağımızı kəsdi və içərisindən iki nəfər düşdü. Bunlar İlhamə Quliyevanın oğlu Orxan Nadirovla onun dostu Vüqar Bəkirov idi. Hətta Orxanın əlində dubinka da var idi. Onlar maşına dubinka ilə vurub, qapını açmağımızı tələb edirdilər. Daxili İşlər Nazirliyinin "102" xidmətinə zəng vurub məlumat verdik. Mehriban onu öldürəcəklərini dedi. Çox qorxdum. Çoxlu siqnal verdim. Bu zaman İlhamə Quliyeva da hadisə yerinə gəldi. O, siqnalı kəsməyimi istədi. İlhamə ikimizi də ölümlə hədələdi. Mehribanın İlhamə Quliyevanın həyatına qəsd hazırlaması, əmlakını ələ keçirməyə cəhd etməsi barədə heç nə eşitməmişəm. Bu bardə xəbərim yoxdur".
Məhkəmənin növbəti prosesi noyabrın 1-nə təyin edilib.
Qeyd edək ki, xalq artisti İ.Quliyevanın sabiq köməkçisi M.Hüseynova 2015-ci il oktyabr ayının 21-də həbs edilib. Onun barəsində Cinayət Məcəlləsinin 29,180.3.2-ci (soyğunçuluğa cəhd, zərərçəkmiş şəxsə külli miqdarda ziyan vurmaqla törədildikdə) maddəsi ilə cinayət işi başlanıb. 2016-cı il fevral ayının 13-də Səbail Rayon Məhkəməsində M.Hüseynova barəsində seçilmiş həbs qətimkan tədbirinin müddəti üç ay uzadılıb.
Xatırladaq ki, İ.Quliyeva 2016-cı il fevral ayının 25-də səhər saatlarında 73 yaşında dünyasını dəyişib.

Tags:  Mehriban Hüseynovanın məhkəməsində şahid ifadə verib Onu İlhamə Quliyeva bıçaqlamışdı


RƏYLƏR


Top news