Aktual mövzular: Dollar alış-satışı , Hava haqqında, Məzənnə, Neftin qiyməti

Zərərçəkən: "Sanki binaya benzin tökülmüşdü"

Zərərçəkən: "Sanki binaya benzin tökülmüşdü"

Date: 25 October 2016 14:09

 

Xətai rayonunda hündürmərtəbəli yaşayış binasında baş verən yanğında təqsirləndirilən Fərid Sadıqov, Zaur Əşrəfov və Nüsrət Muxtarovun cinayət işi üzrə məhkəmə prosesi davam etdirilib.

Lent.az-ın məlumatına görə, Bakı Ağır Cinayətlər Məhkəməsində hakim Eldar İsmayılovun sədrliyi ilə prosesdə prosesdə zərərçəkmiş İslam Aslanov, şahidlər Gündüz Abbasovla Hidayət Süleymanov ifadə veriblər.

İslam Aslanov qeyd edib ki, yanğın baş verən zaman evdə olub: “Yoldaşım çöldən səs gəldiyini dedi. Pəncərəyə yaxınlaşanda hər kəsin həyətda toplaşdığını və binanın yandığını gördüm. Sonra aşağı qaçdıq. Binaya elə bil benzin tökülmüşdü. Evdə hər şey yandı. Kompensiasiya almışıq”.

Şahid qismində dindirilən poliuretan materiallar hazırlayan zavodun işçisi Günduz Abbasov deyib ki, təqsirləndirilən şəxslərdən F.Sadıqovu tanıyır: " Zavoda işə sinif yoldaşım İlham müəllimin dəvəti ilə gəlmişəm. Fərid Sadıqovu da həmin zaman orada İlham müəllimin yanında görmüşəm. Zavodun mühasibatlıq işində köməklik etmişəm".

Hakim G.Abbasovun ilkin ifadəsini elan edib.

Digər şahid Hidayət Süleymanov da təqsirləndirilən şəxslərdən F.Sadıqovu tanıdığını bildirib. “Zavodun tikintisi 3 ilə hazır oldu. Zavodda texniki işlərin görülməsi ilə məşğul olmuşam. Zavodun istehsal etdiyi məhsullarla əlaqəm yox idi. Bu, mənim işim deyildi. Həmin zavodda çalışan zaman ora rəhbərlik edənin Mamed müəllim olduğunu bilirdim. Mərhum Nüsrət Muxtarov isə tikinti işləri üzrə müavin vəzifəsində çalışırdı".

Daha sonra hakim bildirib ki, təqsirləndirilən mərhum N.Muxtarovun nümayəndəsi olan oğlu Asif Muxtarov hərbi xidmətə gedib: "Bundan sonra mərhumun nümayəndəsi N.Muxtarovun qardaşı Elşən Muxtarov olacaq".

Qeyd edək ki, ötən il aprelin 10-da Bakı şəhəri, Xətai rayonu, Zığ yolu küçəsi, 16 saylı ünvanda “TNH” şirkəti tərəfindən fasadında “poliuretan” materialla üzləmə işləri aparılan doqquzmərtəbəli yaşayış binasında ağır nəticələrə səbəb olan yanğın qeydə alınıb.

 

Fakt üzrə Baş Prokurorluğun Ağır cinayətlərə dair İşlər üzrə İstintaq İdarəsində Cinayət Məcəlləsinin müvafiq maddələri ilə cinayət işi başlanıb. Cinayət işi üzrə aparılan baxış, axtarış, götürmə istintaq hərəkətləri ilə “TNH” şirkətinin fəaliyyətinə, istehsal etdiyi “poliuretan” məmulatının keyfiyyət və istehsal texnologiyasına dair zəruri materiallar, həmçinin iş üçün əhəmiyyət kəsb edən digər sənədlər müvafiq qaydada maddi sübut kimi götürülüb.

 

Ağırlaşdırıcı hallarda vəzifə səlahiyyətlərindən sui-istifadə edərək yanğın təhlükəsizliyi qaydalarını kobud surətdə pozaraq Xətai rayonu ərazisində yerləşən qeyd edilən yaşayış binasına və bina sakinlərinə külli miqdarda maddi ziyan vurulmasına səbəb olan əməllərinə görə “TNH” şirkətinin fəaliyyətinə və görülən işlərə faktiki rəhbərliyi həyata keçirən Fərid Sadıqov, şirkətin direktoru Zaur Əşrəfov, şirkət direktorunun tikinti işləri üzrə müavini Nüsrət Muxtarov Cinayət Məcəlləsinin 225.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə təqsirləndirilən şəxs qismində cəlb edilərək barələrində Nəsimi Rayon Məhkəməsinin qərarları ilə 4 ay müddətinə həbs qətimkan tədbiri seçilib.

 

Xatırladaq ki, ötən həftə Bakı İstintaq Təcridxanasında saxlanılan N.Muxtarov orada vəfat edib.

 


Tags:  Zərərçəkən binaya benzin tökülmüşdü


RƏYLƏR


Top news