Ukrayna və Suriya münaqişələrinə görə pozulan Rusiya-ABŞ
münasibətləri hərbi gərginlik müstəvisinə keçir.
Publika.az xəbər verir ki, ABŞ Rusiyanın şimal sərhədində
möhkəmlənmək üçün hərəkətə keçib.
“International Business Times” saytı yazır ki, Amerika 2017-ci ildə
Norveç ərazisində 300 dəniz piyadasını (dəniz pişikləri)
yerləşdirməyi planlaşdırır: “Dəniz piyadaları Rusiya sərhədindən
120 kilometr məsafədə olan “Vernes” hərbi bazasında
yerləşəcək”.
“Röyters” agentliyinin məlumatına görə, Norveç ərazisində xarici
hərbçilər sonuncu dəfə II Dünya Müharibəsi vaxtı yerləşiblər.
ABŞ-ın Avropadakı dəniz piyada qoşunlarının komandanı, general
mayor Nil Nelson deyib ki, dəniz piyadaları Norveçdə hərbi
təlimlərdə iştirak edəcək və Şimali Avropada NATO-nun öz
güclərindən istifadə qabiliyyətini gücləndirəcəklər.
Norveç Rusiya ilə yaxşı münasibətlər saxlamağın tərəfdarıdır. Lakin
son dövrlər Rusiya təyyarələri Norveçin sərhədlərinə yaxın ərazidə
təlim uçuşları etdilər. Bununla yanaşı, Moskvanın İsveç, Danimarka
və Finlandiya sərhədlərində hərbi təlimlər keçirməsi bu ölkələrlə
yanaşı, keçmiş SSRİ respublikaları olan Estoniya, Latviya və
Litvada da ciddi narahatlıq yaradıb.
Norveçin müdafiə naziri İnya-Mari Eriksen Soreyde bildirib ki, ABŞ
əsgərlərinin onların ölkəsinə gəlməsi təhlükəsizlik baxımından
əhəmiyyətlidir.
Məlumatlara görə, bundan əvvəl NATO Polşada və Baltikyanı ölkələrdə
dörd çoxmillətli batalyon yerləşdirib, həmçinin, ABŞ tankları
Avropada yerləşib.
Norveç 1949-cu ildən NATO-nun üzvüdür. Amma Rusiya ilə razılıq
çərçivəsində bu ölkə öz ərazisinə xarici qoşunların yerləşməsinə
icazə vermirdi. Ukrayna və Suriyada başlayan hərbi münaqişələrdən
sonra isə vəziyyət dəyişdi.
Norveçli zabit Yakob Borresen bildirib ki, son proseslər şərq
istiqamətindən neqativ siqnallar yollayır.
Onun fikrincə, bütün bunlar “soyuq müharibə” üslubunda
qarşıdurmalara gətirib çıxara bilər.
Rusiya tərəfi artıq baş verənlərə reaksiya verib. Rusiyanın
Norveçdəki səfirliyinin mətbuat katibi Maksim Qurov “France Presse”
agentliyinə açıqlamasında deyib ki, Norveç atdığı addımları
əsaslandırmalıdır: “Biz anlamaq istəyərdik ki, Norveç niyə öz hərbi
potensialını artırmağı arzu edir və bunu məhz Amerika əsgərlərinin
“Vernes” bazasında yerləşdirməklə həyata keçirir”.
Asif