Azərbaycanın Ukraynadakı səfiri Azər Xudiyev Ukraynanın baş prokuroru Yuri Lutsenko ilə görüşüb.
Azərbaycanınn Ukraynadakı səfirliyindən APA-ya verilən məlumata görə, görüşdə Ukraynanın baş prokuroru Yuri Lutsenko, baş prokurorun müavini Yevqeni Yenin və prokurorluğun rəsmi nümayəndələri, Azərbaycanın Ukraynadakı səfiri A. Xudiyev, Azərbaycan Daxili İşlər Nazirliyinin Ukraynadakı nümayəndəsi, polis polkovniki Şahin Qocayev, Birləşmiş Ukrayna Azərbaycanlıları Konqresinin sədri Rövşən Tağıyev və Konqresin Ali Məclisinin sədri Akif Gülməmmədov iştirak ediblər.
Son iki ildə Ukraynada azərbaycanlı iş adamlarına qarşı həyata keçirilən sui-qəsd və cinayət hadisələrinin qeydə alınmasından narahatlığını ifadə edən A. Xudiyev Y. Lutsenkodan baş vermiş cinayət hadisələrini ciddi nəzarət altına almasını xahiş edib. Azərbaycanla Ukrayna arasındakı strateji dostluq əlaqələrinin pozulmasında maraqlı tərəflərin olduğunu diqqətə çatdıran səfir Ukraynada soydaşlarımıza qarşı həyata keçirilmiş insan oğurluğunun və digər cinayət hadisələrinin üstünün açılması üçün ikitərəfli istintaq qrupunun yaradılması təklifini irəli sürüb.
Azərbaycan DİN-nin Ukraynadakı nümayəndəsi Ş. Qocayev 2014-cü ildən indiyədək Ukraynada Azərbaycanlılara qarşı həyata keçirilmiş cinayət hadisələrini özündə əks etdirən faktlarla bağlı geniş məlumat verib.
Birləşmiş Ukrayna Azərbaycanlıları Konqresinin sədri R. Tağıyev və Konqresin ali məclisinin sədri Akif Gülməmmədov baş vermiş cinayət hadisələri ilə bağlı Ukraynanın Daxili İşlər Nazirliyinə və digər aidiyyəti orqanlarına dəfələrlə rəsmi müraciət olunduğunu və bununla bağlı heç bir ciddi ölçü götürülmədiyini diqqətə çatdırıblar. Y. Lutsenko isə azərbaycanlılara qarşı törədilmiş cinayət hadisələrinin araşdırılması və bu məsələnin ciddi nəzarət altına alınması üçün görüşdə iştirak edən prokurorluğun operativ istintaq qrupuna ciddi göstərişlər verib.
Azərbaycanın baş prokuroru Zakir Qaralov tərəfindən ölkəmizə rəsmi səfərə dəvət olunduğunu diqqətə çatdıran Y. Lutsenko Ukraynadakı soydaşlarımıza qarşı həyata keçirilmiş cinayət hadisələrinin üstü açılmadan Azərbaycana səfər etməyəcəyini vurğulayıb. O, tezliklə cinayətkar qruplaşmanın yaxalanacağına və bundan sonra ölkəmizə səfər edəcəyinə əmin olduğunu bildirib. Görüş zamanı iki ölkənin prokurorluq orqanları arasında əlaqələrin möhkəmləndirilməsi və cinayətkarlığa qarşı birgə istintaq qrupunun yaradılması məsələləri geniş müzakirə olunub.
