Aktual mövzular: Dollar alış-satışı , Çempionlar Liqası, Hava haqqında, Məzənnə, Neftin qiyməti

"Uzuncorab Peppi" azərbaycanca danışdı - FOTO

"Uzuncorab Peppi" azərbaycanca danışdı - FOTO

Date: 30 October 2016 15:32

"Uzuncorab Peppi" ilk dəfə Azərbaycan dilində nümayiş etdirildi

Azərbaycan Dövlət Gənc Tamaşaçılar Teatrında İsveç uşaq ədəbiyyatının məşhur nümayəndəsi Astrid Lindqrenin "Uzuncorab Peppi" romanı əsasında hazırlanmış eyniadlı tamaşanın premyerası olub.  
Milli.Az bildirir ki, tamaşa Dövlət Gənc Tamaşaçılar Teatrı, İsveç Krallığının Azərbaycandakı səfirliyi və Azərcell şirkətinin birgə layihəsi əsasında hazırlanıb. Eyniadlı romanın motivləri əsasında Stafan Qotestamın səhnələşdirdiyi tamaşanın quruluşçu rejissoru Azərbaycan və Kalmıkiya Respublikalarının əməkdar incəsənət xadimi Bəhram Osmanov, quruluşçu rəssamı Elşən Sərxanoğlu, bəstəkarı Sebastian (Danimarka), aranjmançı Rüfət Ramazanov, məsləhətçi görkəmli isveç rejissoru Ronni Danielsson, rejissor assistenti Sona Mustafayevadır.  

Yeni səhnə əsərində əsas obrazları əməkdar artistlər Nəsibə Eldarova, Gülər Nəbiyeva, aktyorlar Zümrüd Quliyeva, Xəyalə Meydanova, Anar Seyfullayev, Gülbəniz Mustafayeva, Aygün Fətullayeva, Güşvər Şərifova, İlqarə Tosova, Venera Abbasova, Hüsniyyə Əhmədova, Xalidə Əliməmmədova, Könül Əbilova, Eyvaz İbrahimov, Elgün Yəhyayev, Vahid Orucoğlu və Ramil Məmmədov ifa ediblər. 

Anasız Peppinin atası dənizdədir. O, tənha qalıb. Belə bir vaxtda onun ən yaxın dostu meymun, bir də atdır. Buna baxmayaraq, o, özünə yeni dostlar da tapır. Lakin bu dostların anası və ətraf  Peppinin sərbəstliyini, qeyri-adi hərəkətlərini anormal sayırlar. 

Sosial təminat şöbəsi isə onu uşaq evinə göndərmək üçün çalışır. Son anda atası gəlib qızını onu anlamayan insanların əlindən qurtarır. 

Tamaşada sahibsiz qalanlara sahib durmaq, köməksizlərə əl uzatmaq, vətənpərvər, insanpərvər olmaq, ailə tərbiyəsinin əhəmiyyəti barədə çoxlu fikirlər səslənir. 
Gənc tamaşaçılar üçün böyük tərbiyəvi əhəmiyyəti olan bu tamaşa aktyor oyunu, gözəl dekorasiyası və bir sıra yaxşı məziyyətləri ilə maraqla baxılır.

Qeyd edək ki, sözügedən teatr layihəsi bu ilin əvvəlində səfirlik, Azercell şirkəti və Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsinin birgə kitab layihəsinin davamı olaraq təqdim olunur. Belə ki, qeyd olunan kitab layihəsi çərçivəsində Astrid Lindqrenin əsərlərindən ibarət  9 ədəd uşaq kitabı Azərbaycan dilinə tərcümə edilərək nəşr olunub və 610 qaçqın məktəbinin kitabxanalarına hədiyyə edilib. 

Məlumat üçün bildirək ki, 2014-cü ildə başqa bir beynəlxalq layihə çərçivəsində A.Lindqrenin "Balaca və damda yaşayan Karlson" əsəri böyük uğurla səhnələşdirilib. Tamaşa teatrın cari repertuarında oynanılmaqdadır. 

Milli.Az 




Tags:  Uzuncorab Peppi azərbaycanca danışdı FOTO

RƏYLƏR


Top news