Aktual mövzular: Dollar alış-satışı , Hava haqqında, Məzənnə, Neftin qiyməti

Marneulidəki seçkidə azərbaycanlıları kim hədələyib? - Məğlub namizəd danışdı

Marneulidəki seçkidə azərbaycanlıları kim hədələyib? - Məğlub namizəd danışdı

Date: 31 October 2016 12:53

Dünən Gürcüstanda parlament seçkilərinin II turu başa çatıb. Azərbaycanlıların kompakt yaşadığı Marneuli rayonunda “Vahid Milli Hərəkat” partiyasının azərbaycanlı namizədi Əhməd İmamquliyev I turda qalib gəlsə də, II turda nəticələr hakim “Gürcü arzusu” partiyasının namizədi Tamaz Naverianinin xeyrinə dəyişib.

Publika.az
-a açıqlamasında Ə.İmamquliyev bildirib ki, seçkilər total saxtakarlıqla müşahidə olunub: “Bir gün öncədən seçicilər təhdid olunurdu ki, hakim partiyanın namizədinə səs verilsin. Yerli əhaliyə hədə-qorxu gəlirdilər”.

Ə. İmamquliyev qeyd edib ki, Marneulidə seçicilərə hədə-qorxu gələn şəxs əslən azərbaycanlı olan polis dəstəsinin rəisi Bəhruz Abdurrahmanov olub.

“Bu şəxs seçkidən bir gün öncə axşam saatlarında evlərə bir-bir gedərək, Tamaza səs vermələrini tələb edib, əks təqdirdə, övladlarını həbs etməklə hədələyib. Bəhruzun bu işdə iştirakının səbəbi atası Şirvan Abdurrahmanovun da hakim partiyadan namizəd olması idi. Şirvan başqa dairədə namizəd idi. Hətta onun kənd yerlərində insanlara səs almaq üçün pul payladığı haqda kifayət qədər məlumatlar var”, - deyə o bildirib.

Ə.İmamquliyev mübarizələrinin davam edəcəyini diqqətə çatdırıb: “Seçkinin nəticələrinin tanınmaması ilə bağlı qanun çərçivəsində mübarizəmiz davam edəcək. İnanmıram ki, hakim partiyanın nəzarətində olan məhkəmələr bununla bağlı doğru qərar çıxarsın. Lakin bütün bunlara baxmayaraq, sona qədər mübarizə aparacağıq”.

Qeyd edək ki, svan əsilli Tamaz Naverianin qalib gəlməsi azərbaycanlılar tərəfindən birmənalı qarşılanmayıb. Sosial şəbəkələrdə verilən reaksiyalarda “Marneulidə keçirilən seçki, təkcə Gürcüstanın daxili məsələsi deyildi, 36-cı dairədə əsas favorit namizəd olan Əhməd İmamquliyevin timsalında və svan Tamazın obrazında azərbaycanlıların ölüm-qalım savaşı idi, parlamentdə xalqımıza məxsus 5-ci mandat olmalı idi. Amma bu yarışı kriminal, quldur svana uduzduq, özü də Marneulidəkilərin qorxudulması, şantaj edilməsi hesabına...” kimi fikirlər yer alıb.

Ə.İmamquliyev qeyd edib ki, rəqibi Tamaz svan əsillidir.

“Gürcüstanda svanlar artıq gürcü olaraq qəbul edilir. Burada bu məsələni qabartmaq istəməzdim. Əsas məsələ hakim partiyanın öz namizədinin qalib gəlməsi üçün bütün vasitələrə əl atmasıdır. Bunu da etdilər”, - deyə o vurğulayıb.

Asif


Tags:  Marneulidəki seçkidə azərbaycanlıları kim hədələyib Məğlub namizəd danışdı

RƏYLƏR


Top news