“Mən əvvəldən seçkilərin qiymətini verdim. Bu, SUS (Dövlət Təhlükəsizlik Xidməti) briqadasının rəhbərliyi altında səslərin topdansatışı idi. 8 oktyabrda 41 sandıqda Vahid Milli Hərəkat Partiyasının səslərini oğurladılar. II turda isə oğurluq 20 sandıqda aparıldı”.
Bu barədə Publika.az-a açıqlamasında Vahid
Milli Hərəkat Partiyasının üzvü, Gürcüstan parlamentinin keçmiş
deputatı Ramin Bayramov Gürcüstanda parlament seçkilərinin II
turunun nəticələrini şərh edərkən deyib.
Onun sözlərinə görə, seçkidə bütün dövlət strukturları tam şəkildə
işləyirdi: “Heç bir məmur kənarda qalmamışdı, çünki sərt ultimatum
yuxarıdan verilmişdi. Müəllimlər, tərbiyəçilər, həkimlər, məmurlar,
büdcə təşkilatlarının işçiləri, ticarət təşkilatlarının işçiləri və
digərləri prosesdə iştirak edirdi. Yəni kimə açıq, yaxud qismən
təzyiq göstərmək mümkün idisə, prosesə qoşmuşdular. Bütün qanuni və
qanunsuz, mümkün və qeyri-mümkün metodlardan istifadə edildi”.
R.Bayramov azərbaycanlıların kompakt yaşadığı Marneulidə “Gürcü arzusu” partiyasının namizədinin qalib gəlməsinə də münasibət bildirib.
“Burada məsələ Əhməd İmanquliyevdə, yaxud hakim partiyanın
namizədində deyil. Şəxsiyyətlər haqda mən pis heç nə deyə bilmərəm.
Lakin hesab edirəm ki, hakim partiya seçicilərin əksəriyyətinin
azərbaycanlılar təşkil etdiyi ərazidə Tamaz Naverianinin
namizədliyini irəli sürməməli idi. Xüsusilə bütün qanunsuz
metodlardan istifadə edərək, onun qələbəsini təmin etmək doğru
addım deyildi. Axı siyasi hakimiyyətin özü Marneulini Gürcüstan
azərbaycanlılarının siyasi mərkəzi hesab edir. Təzyiq və güc yolu
ilə əldə olunan qələbə marneulililərin əksəriyyəti, həmçinin,
onların demokratik dəyərlərə inamı üçün təhqirdir. Hesab edirəm ki,
hakimiyyət bu yanaşması ilə sələflərinin qurduğu güclü dövlət
əsaslarını dağıtdı. Regionda qeyri-sabit geosiyasi vəziyyət fonunda
bunu etmək son dərəcədə hiddət doğurur”, - deyə o bildirib.
R.Bayramov əlavə edib ki, “Gürcü arzusu” bu seçki ilə Gürcüstanda
demokratiya və insan azadlığını öldürdü: “Lakin vətənpərvərlik ruhu
əksəriyyətdə məhv olmayıb və bu, yaxın vaxtlarda İvanişvili
komandasını mütləq haqlayacaq. Mübarizə davam edir və Gürcüstan
vətənpərvərlərin daha güclü, birləşmiş komandası ilə davam
edəcək”.
Asif