Aktual mövzular: Dollar alış-satışı , Hava haqqında, Məzənnə, Neftin qiyməti

Braziliya rəsmisi: "Dağlıq Qarabağ münaqişəsi BMT TŞ-nin qətnamələri əsasında həll edilməlidir" - FOTO

Braziliya rəsmisi: "Dağlıq Qarabağ münaqişəsi BMT TŞ-nin qətnamələri əsasında həll edilməlidir" - FOTO

Date: 31 October 2016 17:05

Milli Məclisin sədri Oqtay Əsədov Azərbaycanda səfərdə olan Braziliya Federativ Respublikası Milli Konqresinin Deputatlar Palatasının sədri Rodriqo Mayanın rəhbərlik etdiyi nümayəndə heyəti ilə görüşüb.

Milli.Az Trend-ə istinadən bildirir ki, O.Əsədov R.Mayanın parlament sədri kimi ölkəmizə ilk səfərinin ikitərəfli əlaqələrin inkişafına təkan verəcəyini bildirib. Parlamentlərarası əlaqələrin razılıq doğurduğunu söyləyən Milli Məclisin sədri dostluq qruplarının fəaliyyətini xüsusi vurğulayıb. O qeyd edib ki, parlamentarilərin qarşılıqlı səfərləri münasibətlərin möhkəmlənməsinə imkan yaradır.

İki ölkə arasında iqtisadi əlaqələrin inkişaf etdirilməsinin vacibliyindən danışan O.Əsədov deyib ki, bu sahədə əməkdaşlığın genişləndirilməsi üçün birgə biznes forumların təşkili xüsusilə əhəmiyyətlidir. Sədr bildirib ki, 2015-ci ildə ölkələrimiz arasında ticarət dövriyyəsi 120 milyon dollar olub, 2016-cı ilin doqquz ayı ərzində isə bu rəqəm 150 milyon dollara çatıb. O.Əsədov bu artımın iki ölkənin potensialından aşağı olduğunu əlavə edib.

Milli Məclisin sədri Ermənistan-Azərbaycan, Dağlıq Qarabağ münaqişəsinin həlli məsələsində ölkəmizin haqlı mövqeyini dəstəklədiyinə görə Braziliya hökumətinə təşəkkür edib. Braziliyanın hər zaman Azərbaycanın ərazi bütövlüyünü tanıdığını deyən O.Əsədov bu yaxınlarda Deputatlar Palatasında Ermənistanın işğalçı siyasətini pisləyən birgə bəyanat qəbul olunmasına görə də minnətdarlığını bildirib.

Braziliya Milli Konqresi Deputatlar Palatasının sədri R.Maya ölkələrimiz arasındakı əlaqələrin daha da genişləndirilməsinin önəmini qeyd edib. O, səfərin əsas məqsədinin bununla bağlı müzakirələr aparılması olduğunu diqqətə çatdırıb. Parlamentin sədri Azərbaycan ilə Braziliya arasında neft-qaz, turizm sahələrində əməkdaşlığın inkişafının vacibliyini qeyd edib. Turizm əlaqələrindən danışan R.Maya Braziliyada Azərbaycanın daha yaxından tanıdılmasının əhəmiyyətini vurğulayıb.

R.Maya Braziliyanın Ermənistan-Azərbaycan, Dağlıq Qarabağ münaqişəsinin BMT Təhlükəsizlik Şurasının qətnamələri əsasında həllinin tərəfdarı olduğunu söyləyib.

Görüşdə O.Əsədov R.Mayanın prezident İlham Əliyevin sərəncamına əsasən, Azərbaycan Respublikası ilə Braziliya Federativ Respublikası arasında dostluq əlaqələrinin inkişafında xidmətlərinə görə "Azərbaycan Respublikası prezidentinin fəxri diplomu" ilə təltif olunduğunu deyib.

Milli Məclisin sədri fəxri diplomu R.Mayaya təqdim edib.

Milli.Az





Tags:  Braziliya rəsmisi Dağlıq Qarabağ münaqişəsi BMT TŞ-nin qətnamələri əsasında həll edilməlidir FOTO


RƏYLƏR


Top news