Bu gün Avropa Liqasında IV turun oyunları keçiriləcək. Ölkəmizi qitə miqyaslı turnirdə təmsil edən “Qarabağ” Yunanıstanda PAOK-un qonağı olacaq. “Qəbələ” isə Bakıda Fransanın “Sent-Etyen” klubunu qəbul edəcək.
Avrokubok tarixində ilk dəfə Yunanıstana səfər edən “Qarabağ”ın taleyi öz əlindədir. Ağdam klubu 1/16 final mərhələsinə vəsiqə uğrunda mübarizəni davam etdirmək üçün səfərdən sərfəli nəticə ilə dönməyə çalışmalıdır.
Ötən mövsüm “Qəbələ” ilə hər iki oyunda qolsuz bərabərliklə kifayətlənən Saloniki təmsilçisi 12 gün əvvəl Bakıda “Qarabağ”a 0:2 hesablı məğlub olub. Məhz bu səbəbdən “köhlən atlar” hazırda eyni – 4 xala malik olduğu rəqibini turnir cədvəlində qabaqlayır. Bu üstünlüyü əldən verməmək üçün məğlub olmamaq şərtdir. Əks halda, təmsilçimiz işini çətinə salmış olacaq. Çünki “Qarabağ”ın qarşıda evdə yenə bilmədiyi “Slovan”la Çexiyada və 1:5 hesabı ilə uduzduğu “Fiorentina” ilə Bakıda oyunları var.
“Slovan”ı səfərdə məğlub edib (2:1), evdə “Fiorentina”dan xal alan (0:0) PAOK Avropa Liqasının qrup mərhələsində keçirdiyi son 4 ev oyununda heç-heçə edib ki, bu da ağdamlıların Salonikidən müsbət nəticə ilə dönməyin mümkünlüyündən xəbər verir.
Həm “Qarabağ”, həm də PAOK ölkə çempionatının son turunda qələbə qazanıb. 22 xalla turnir cədvəlinin 2-ci pilləsində qərarlaşan Ağdam təmsilçisi yunanlarla oyun ərəfəsində Muarem Muaremin yeganə qolu ilə AZAL-ı məğlub edib. Elə Saloniki təmsilçisi də 1:0 hesablı qələbəyə sevinib. Hesabından 3 xalı silinmiş, hazırda 11 xalla 16 klub arasında 3-cü sırada olan PAOK doğma meydanda AEK-i üstələyib.
“Qarabağ”la oyun ərəfəsində PAOK-un heyətindəki itkilər diqqət çəkir. Belə ki, Calma Kampos, Georgios Tzavellas, Dimitris Cannulis və Dimitris Pelkasın zədələnməsi baş məşqçi Vladimir İviçi çətin vəziyyətdə qoyub.
Ağdam klubunda isə zədəlilər – Reynaldo ilə Miçelin sıraya dönməsi Qurban Qurbanovu sevindirməyə bilməz. Komandamız yunanlara qarşı optimal heyətlə çıxış edə biləcəklər.
PAOK-un baş məşqçisi Vladimir İviç Bakıdakı 0:2 hesablı məğlubiyyətdən sonra jurnalistlərin suallarını cavablandırarkən bildirmişdi ki, ilk dəfədir komandasında bu cür fəaliyyətsizlik görürür: “İstədiklərmizi həyata keçirə bilmədik. Amma şanslarımız öz əlimizdədir. İstədiyimiz təzyiqi edə bilmədik. Topsuz oyunda zəif çıxış etdik. Növbəti 3 oyunumuzdan 2-si evdədir, uğur qazanmağa çalışacağıq”.
İviçində dediyi kimi, “Qarabağ”ın evdə yunanları məğlub etməsinin əsas səbəbi rəqibini topsuz qoymasıdır. Təbii ki, Qurbanov da bu amilin fərqindədir. Ağdam təmsilçisi səfərdə müdafiə olunaraq deyil, topa daha çox sahib olmaqla istədiyinə nail ola bilər. Lakin topa sahib olmaqla bərabər, irəlidə risk almamaq da vacibdir. Çünki “Qarabağ”ı üçün öncəlik 1 xal əldə etməkdir. Oyunun gedişindən asılı olaraq müəyyən həmlələr etmək, boşluqlardan yararlanıb, qələbə qazanmaq barədə düşünmək olar.
00:05 PAOK (Yunanıstan) – Qarabağ (Azərbaycan)
Baş hakim: Con Biton
Yan xətt hakimləri: Duqlas Potter, Eleste Maze
Köməkçi hakimlər: Stiven Maklin, Donald Robertson
Dördüncü hakim: Sin Karr (hamısı Şotlandiya)
Əlavə köməkçi hakimlər: Steven Maklin, Donald Robertson
UEFA nümayəndəsi: Darko Çeferin (Sloveniya)
Hakim-inspektor: Qenadie Skurtul (Moldova
Saloniki. “Tumba” stadionu
1. “Fiorentina” (İtaliya) 3 2 1 0 8-2 7
2. PAOK (Yunanıstan) 3 1 2 0 2-3 4
3. “Qarabağ” (Azərbaycan) 3 1 1 1 5-7 4
4. “Slovan” (Çexiya) 3 0 1 2 4-7 1
Matçdan məqamlar...
- PAOK-un hücumçusu Fakundo Pereyra ötən mövsümü icarə əsasında “Qəbələ”də keçirib.
- Ağdam təmsilçisinin qapıçısı Boyan Şaranov və yarımmüdafiəçisi Miçel PAOK üçün Yunanıstan yad ölkə deyil. Serbiyalı qolkiper 2015-ci ildə “Erqotelis”in formasını geyinib, ispaniyalı yarımmüdafiəçi isə 2011-ci ildə AEK-də çıxış edib.
- “Qarabağ”ın hücumçusu Dino Ndlovu və PAOK-un forvardı Eftimis Kolouris 2015-16 mövsümündə “Anortosis”də komanda yoldaşı olublar.
Fanat.Az
