Aktual mövzular: Dollar alış-satışı , İstanbulda terror, Hava haqqında, Məzənnə, Neftin qiyməti

Küçəni zibilləyən itlər

Küçəni zibilləyən itlər

Date: 7 November 2016 09:59

İTİNİZ KÜÇƏDƏ KAK EDƏRSƏ


Bir neçə gün əvvəl bir cavan oğlan balaca, sevimli iti ilə önümdə gedirdi. Birdən it dayanıb səkidə təbii ehtiyacını ödəməyə başladı. İşini bitirdikdən sonra gənc sahibi onun ipini dartıb yoluna davam elədi. İçi mən qarışıq, səkidə addımlayanların bu mənzərəyə etinasız yanaşması, nəcisin kənarından “obqon” edib yollarına davam etmələri məni narahat elədi. Sanki hər şey qaydasındadı, belə də olmalıdı. Bizdə hələlik belədi, kiminsə iti mənim şəxsi həyətimdə “kak” eləməyibsə, bu söhbət mənlik deyil. 
Dəfələrlə bu və ya buna bənzər hadisələrin şahidi olmuşam. Təkcə mən yox, yəqin, hamınız yol kənarlarında, (bəzən yolun ortasında) parkların içində, əhalinin gəzdiyi səkilərdə oxşar xoşagəlməz mənzərələrlə rastlaşmısınız. İt nəcisinə ayağınız batıb, yaxud ayağı batanların asfalta sürtülmüş izlərini görmüsünüz.
Bəs bu problemi necə yoluna qoymaq olar?
Hansı tədbirlər görülməlidi ki, gəzintiyə çıxarılan sevimli heyvanların buraxdığı zir-zibil küçənin ortasında qalmasın? Şəhərin təmizliyinə, insanların istirahətinə mane olmasın?
 

Bu haqda xeyli fikirləşdim, problem haqda feysbuk səhifəmdə yazan kimi Avropada yaşayan soydaşlarımız yerbəyerdən oradakı təcrübələrdən misal çəkdilər.


Avropalılar anoloji vəziyyətdən çıxış yolunu çoxdan tapıblarmış, bunu həmvətənlərimin yazdığı şərhlərdən öyrəndim.
Almaniyada yaşayan rəssam dostumuz Azər Vəli  bildirdi ki, yaşayış yerlərinin hər addımlığında heyvanların zibilini təmizləmək üçün xüsusi qutular və paketlər qoyulub. Bələdiyyələr küçə və parkların təmizliyinə xüsusi nəzarət edir. Əgər kimsə heyvanının nəcisini buraxdığı yerdə qoyub gedərsə, bunu görən istənilən vətəndaş polisə zəng edir və adamın yürüdüyü yeri söyləyir. Polis dərhal həmin it sahibini  saxlayıb cərimələyir.
 

Sözsüz ki, polis it gəzdirən vətəndaşları güdə bilməz. Belə hallarda, əsasən, ictimai qınaq insanları bu pintilikdən çəkindirir. Hollandiyadakı həmvətənimiz əminliklə deyir ki, onların  cəmiyyətində bu kimi məsələlər ictimai şüurda elə oturuşub ki, hətta cərimə və qınaq olmasa belə, hamı publik yerlərdə təmizlik qaydalarına qeyd-şərtsiz əməl edir.
 

Çexiyada yaşayan həmyerlimiz Zamiq Məmmədli orada bütün yolların və yaşayış yerlərinin ətrafında bu məqsədlə hər kiçik məsafədən bir xüsusi qutu, süpürgə və paketlərin qoyulduğunu yazdı və nümunə kimi həmin zibil qutularının bir neçəsinin şəklini çəkib mənə göndərdi.


Belçikada da demək olar, eyni metoddan istifadə olunur. İt, pişik, quş zibilini təmizləmək üçün mağazalarda lazımi əşyalar satılır, həmçinin, bütün ictimai yerlərdə bu əşyalara rast gəlmək olar. Sevimli itini gəzintiyə çıxaran hər bir it sahibinin çantasında hazır paket və xüsusi kağız xətəngaz olur.

Şair dostumuz Sevinc Elsevərin yazdığına görə,  problemin, primitiv olsa belə, bizdə də həll edildiyi bölgə varmış: “Bu yaxınlarda lahıclı bir qadından öyrəndim ki, Lahıcda heyvan saxlayan adam çox azdı. Çünki Lahıc küçələrində heyvanları haylayarkən əlində bel də aparırsan ki, “kak” eləsə təmizləyəsən. Hətta qadın zarafat da elədi ki, vay o gündən heyvan ponos ola…”
 

Dediyimiz məsələnin ictimailəşdirilməsi bəzi adamlara əhəmiyyətsiz, hətta gülməli görünə bilər. Amma bilməliyik ki, küçələrdə it-pişik nəcisinin qalıqları təkcə natəmizlik və çirkab yaratmaqla bitmir. Məlumunuz olsun ki, it və pişik nəcisində insan həyatı üçün təhlükəli qurdların toxumları və ağır xəstəliklər törədə bilən bakteriyalar yaşayır. İt nəcisindəki parazit qurdların yaşama qabiliyyəti uzunmüddətli olduğundan onlar açıq havada münbit şəraitə düşür və ətrafa daha çox mikrob yayırlar.
İnanıram ki, bu problem avropalıların təcrübəsinə söykənərək Azərbaycanda da hər hansı bir formada öz həllini tapacaq.
 


Tags:  Küçəni zibilləyən itlər


RƏYLƏR


Top news