Aktual mövzular: Dollar alış-satışı , Hava haqqında, Qarabağ, Qəbələ, Məzənnə, Neftin qiyməti

Rauf Arifoğlu: “Alındı, həm də çox yaxşı alındı"

Rauf Arifoğlu: “Alındı, həm də  çox yaxşı alındı"

Date: 10 November 2016 13:48

Bu gün “Yeni Müsavat” qəzetinin təsis olunmasından 27 il keçir.

Qəzetinin baş redaktoru Rauf Arifoğlu Publika.az-a 27 illik uğurun səbəbindən və sirrindən danışıb. O bildirib ki, 27 il Azərbaycanın qəzet və fikir tarixi üçün böyük bir dövrdür: “Qəzetimizin keçdiyi 27 il Azərbaycan üçün ən gərgin, ən həssas, ən təlatümlü illərə təsadüf edir. Qəzetimiz sovet hökuməti dövründə gizli təşkilat kimi yaradıldı. Qəzet yaranandan sonra hakimiyyət dəyişdi, çevrilişlər oldu, torpaqlarımız işğal altına düşdü. Bir sözlə, bu illərə o qədər böyük tarixi hadisələr təsadüf edir ki, onların hər biri haqqında ayrıca film çəkmək olar. Bir qəzet olaraq həm də həmin dövrlərin səlnaməçisiyik. Bu vaxta qədər çap olunmuş 6571 sayımızın səhifələrinə baxdıqda hər bir dövrün mənzərəsini görmək olar. Bu say həm də dayanmadan 20 illik iş günləri deməkdir. Ona görə də, “Yeni Musavat” qəzeti haqqında qısa müddətdə danışmaq olduqca çətindir”.

R.Arifoğlu bildirib ki, “Yeni Müsavat” bu gün ən çox yaşı olan qəzetlərdən biridir və mediada hələ də, öncül yerlərdən birini tutur: “Bütün bunlar hamısı böyük bir zəhmətin bəhrəsidir. Allahın insana verdiyi ən böyük istedad zəhmətkeş olmaqdır. O istedad kimdə varsa, irəli gedir. Bizə də Allah bunu bəxş edib. Yorulmadan, bezmədən media sektorunda çalışırıq. Bu kollektivdə çalışan hər kəs günlərinin ən dəyərli saatlarını qəzetə, xəbərə həsr edir. Buna görə də, həm onlara, həm də bizi oxuyan hər kəsə təşəkkür edirəm”.

Baş redaktor gələcəyə yönəlik planlarını da açıqladı: “Ən azı bu cür davam etmək, ən çoxu isə yüksələn xətlə daha da inkişaf etmək, əsas qayəmizdir. Zamanın kəsimində yeni media, internet mediası imkanları yarandı. Biz də həmin imkanlardan keyfiyyətlə yararlandıq. “Yeni Musavat” qəzetinin elektron versiyası, musavat.com saytı 2000-ci ildən fəaliyyət göstərir. Hazırda ölkənin yaxşı və keyfiyyətli xəbər yayan yeni mediasından biri hesab edilir, rus və azərbaycan dilində xəbər verir. “Yeni Musavat” media qrupu içərisində minval.az saytı fəaliyyət göstərir, rus və anadolu türkcəsində xəbər yayımı həyata keçirir. Biz sinerji oluşdurduq, klassik qəzet mediası ilə yeni medianın çulğalaşmış bir vəziyyətdə, bərabər yayın yapmasını yoxladıq. Hesab edirəm, alındı, həm də çox yaxşı alındı. Gələcəyə doğru planlarımızdan biri də internet televiziyanın açılmasıdır. Bu ya əlavə sayt, ya da saytlarımızın biri üzərindən televiziya yaratmağı düşünürük. Təəssüf ki, dünyamız, ölkəmiz iqtisadi böhran içərisindədir. Həmin böhranlar mane olmazsa, gələcəyə yönəlik planlarımız var”.

Publika.az olaraq biz də “Yeni Müsavat” kollektivini təbrik edir, işlərində yeni müvəffəqiyyətlər arzulayırıq.

Gülxar


Tags:  Rauf Arifoğlu Alındı çox alındı

RƏYLƏR


Top news