Aktual mövzular: Dollar alış-satışı , Hava haqqında, Məzənnə, Neftin qiyməti

Bakıda Respublika Uşaq-Gənclər İnkişaf Mərkəzi yaradılıb

Bakıda Respublika Uşaq-Gənclər İnkişaf Mərkəzi yaradılıb

Date: 10 November 2016 15:29

 

Respublika Ekoloji Tərbiyə və Təcrübəçilik, Respublika Gənc Turistlər və Diyarşünaslıq mərkəzləri və T.İsmayılov adına Bakı Şəhər Uşaq-Gənclər Yaradıcılıq Sarayının bazasında Respublika Uşaq-Gənclər İnkişaf Mərkəzi yaradılıb.

 

Təhsil Nazirliyindən Lent.az-a verilən məlumata görə, yeni müəssisənin yaradılması yaradıcılıq profilli məktəbdənkənar təhsil müəssisələrinin vahid idarəetmə mexanizminin qurulması, mövcud ştat vahidləri və dərs yükü çərçivəsində onların maddi-texniki baza ilə təminatının təkmilləşdirilməsi məqsədi daşıyır.

 

Mərkəzdə uşaq və gənclərin asudə vaxtlarının müxtəlif profilli istiqamətlər üzrə səmərəli təşkili və onların hərtərəfli inkişafı üçün müasir dövrün tələblərinə cavab verən məkanların yaradılması nəzərdə tutulub. Geniş profilli müəssisə yaratmaqla, elm, texnologiya, ekologiya və yaradıcılığın bütün sahələrini əks etdirən, müasir gəncliyin tələbatına uyğun dərnək və qrupların, klub və s. birliklərin təşkili, müxtəlif müsabiqə, sərgi, bayram tədbirlərinin, həmçinin elmi-laborator təcrübələrin keçirilməsi planlaşdırılır.

 

Qeyd edək ki, Respublika Uşaq-Gənclər İnkişaf Mərkəzinin İçərişəhər ərazisindəki keçmiş Azərbaycan Ensiklopediyasının binasında yerləşdirilməsi nəzərdə tutulub. Lakin qeyd olunan binada təmir işləri yekunlaşanədək həmin mərkəzlər öz fəaliyyətini hazırkı binalarında davam etdirəcəklər.

 

Yeni mərkəzin qədim tarixin yaddaşı olan məkanda fəaliyyəti qoruğa daha çox uşaq və gənclərin cəlb edilməsi, eyni zamanda İçərişəhərin “Canlı tarix” konsepsiyasının reallaşdırılması istiqamətində növbəti addım olacaq, gənclərimizin vətənpərvərlik ruhunda tərbiyə olunması, onların estetik dünyagörüşünün milli köklər üzərində formalaşmasına da müsbət təsir göstərəcək.

Yeni yaradılan müəssisənin maddi-texniki bazasının möhkəmləndirilməsi, təchizatının gücləndirilməsi, təlimin müasirləşdirilməsi, cəlbediciliyin yüksəldilməsi gənclərin intellektual potensialına müsbət təsir göstərəcək.

 


Tags:  Bakıda Respublika Uşaq-Gənclər İnkişaf Mərkəzi yaradılıb


RƏYLƏR


Top news