Aktual mövzular: Dollar alış-satışı , Hava haqqında, Məzənnə, Neftin qiyməti

Şəhərsalma və Tikinti Məcəlləsinə dəyişikliklər edilib

Şəhərsalma və Tikinti Məcəlləsinə dəyişikliklər edilib

Date: 11 November 2016 12:52

Bakı. 11 noyabr. REPORT.AZ/ Şəhərsalma və Tikinti Məcəlləsinə dəyişikliklərin edilməsinə dair qanun layihəsi Milli Məclisin bugünkü plenar iclasında müzakirə olunaraq təsdiq edilib.
"Report"un verdiyi xəbərə görə, dəyişikliyə əsasən, müfəssəl planda yaşayış məntəqəsinin yaşıllıqla təmin edilməsi normasına uyğun parklar nəzərdə tutula bilər. Qeyd edək ki, bundan əvvəl isə yaşıllıqla təmin edilməsi normasına uyğunluq qeyd olunmamışdır.
Həmçinin, tikinti obyektinə dair tələblərə dəyişiklik edilib. Belə ki, tikinti obyektinin layihələndirilmə və tikilmə tələblərinə edilən əlavəyə əsasən,  tikintinin layihə sənədlərində layihədən əvvəlki və sonrakı dövrlərdə ərazidəki yaşıllıqların vəziyyətini göstərən məlumatlar tam və dürüst əks edilməli, yaşıllıqların salınması mütləq həmin yaşayış məntəqəsinin yaşıllıqla təmin edilməsi normasına uyğun olmalıdır.
Eyni zamanda, tikinti fəaliyyətinin ətraf mühitin mühafizəsi tələblərinə uyğun həyata keçirilməsində dəyişiklik edilib. Dəyişikliyə əsasən, ekoloji təhlükəsizlik və sanitariya-gigiyena, habelə yaşayış məntəqələrinin yaşıllıqla təmin edilməsi normalarına uyğunluq da əlavə edilib. Belə ki, tikinti işləri ətraf mühitin mühafizəsi, ekoloji təhlükəsizlik və sanitariya-gigiyena, habelə yaşayış məntəqələrinin yaşıllıqla təmin edilməsi normalarına uyğun olaraq həyata keçirilməlidir.
Eyni zamanda yeni redaksiyaya əsasən, yaşayış məntəqələrinin yaşıllıqla təmin edilməsi normaları müvafiq icra hakimiyyəti orqanı tərəfindən müəyyən ediləcək.
Digər dəyişikliklə tikinti layihələrinin icrası nəticəsində götürülən yaşıllıqların miqdarı, növ tərkibi və bərpa dəyəri haqqında məlumatlar toplanmalıdır: "Tikintiyə icazədə tikinti ərazisində olan ağacların, kolların və digər yaşıllıqların mühafizəsi tədbirləri nəzərdə tutulmalıdır. Tikinti layihələrinin icrası nəticəsində götürülən yaşıllıqların miqdarı, növ tərkibi və bərpa dəyəri haqqında məlumatlar tikinti layihəsinin ekologiya bölməsinə daxil edilir”.
Dəyişiklikdən əvvəl isə qeyd olunub ki, tikintiyə icazədə tikinti ərazisində olan ağacların, kolların və yaşıllıqların mühafizəsi nəzərdə tutulduqda, həmin ağaclar, kollar və yaşıllıqlar tikinti işləri zamanı müvafiq tədbirlər vasitəsilə qorunmalıdır.


Tags:  Şəhərsalma Tikinti Məcəlləsinə dəyişikliklər edilib

RƏYLƏR


Top news