Bakı. 11 noyabr. REPORT.AZ/ Dekabrın 31-də Dünya Azərbaycanlılarının Həmrəyliyi Günü və Yeni İl münasibəti ilə "ƏN Yeni İl" adlı konsert proqramı təşkil olunacaq. Bakı Olimpiya Stadionunun mətbuat xidmətindən "Report"a verilən məlumata görə, konsert proqramında yerli ulduzlar Röya və Miri Yusif ilə yanaşı, türk estrada ulduzları Hadise, Demet Akalın, Murat Dalkılıç, Berksan, Ozan Doğulu, məşhur DJ-lər Cemre və Mahmut Orhan çıxış edəcəklər.
Stadionun əsas meydançasında təşkil olunacaq konsert proqramı Yeni ilə geri-sayım, bayram atəşfəşanlığı və diskoteka ilə davam edəcək. Konsertə gələcək qonaqlara lotoreya vasitəsi ilə sürprizlər ediləcək. Bilet nömrəsinə görə oynanılacaq lotoreyada 1 şanslı iştirakçı AAAF Park Yaşayış Kompleksində mənzil sahibi olacaq.
AAAF Holdinqə bağlı AAAF Media MMC-nin direktoru Rəşad Əliyevin sözlərinə görə ““AAAF İnşaat” hər zaman vətəndaşlarımızı sərfəli və rahat mənzillərlə təmin edib: "AAAF Park Yaşayış Kompleksi 2012-ci ildə “AAAF İnşaat” MMC tərəfindən tikintisinə başlanmış və uğurla həyata keçirilən böyük, dövrünü qabaqlayan, ən müasir standartlara cavab verən, təkrarolunmaz bir layihədir".
Tədbirin informasiya dəstəkçisi "Report" İnformasiya Agentliyidir. Sponsorlar isə AAAF Park Yaşayış Kompleksi, "High Boost", "Seat", "Baku Entertainment Factory" və Iticket.az saytıdır.
