Bakı. 14 noyabr. REPORT.AZ/ Azərbaycanın "Caspian Marine Services" MMC-nin (CMS) Almaniyanın "ER Offshore" şirkətindən hər birinin satış qiyməti təxminən 6 mln. ABŞ dolları olan "E.R.Stavanger" və "E.R.Aalesund" adlı iki ədəd platformaların təchizat gəmilərinin (PSV – Platform Supply Vessel) dəyəri şirkətə əslində ən azı 10,5 mln. dollara başa gələcək.
Bu, "Caspian Marine Services"dən "Report"a verilən məlumatda bildirilib.
"Bir müddət əvvəl bəzi KİV-də gəmilərin dəyərinin 6 mln. dollar olduğu qeyd edilib. Amma əslində tərəflər gəmilərin alqı-satqısına dair hələlik yalnız ilkin razılığa gəliblər. Bu sövdələşmənin tam həyata keçirilməsi istiqamətində danışıqlar aparılır və bir sıra məqamların razılaşdırılmasına ehtiyac duyulur. Anlaşma əldə olunarsa, gəmilərin Xəzər dənizinə çatdırılması üçün müəyyən işlərin görülməsinə ehtiyac yaranacaq", - deyə məlumatda qeyd olunub.
Qeyd edək ki, bu gəmilər bir ildən artıq müddətdir saxlanma vəziyyətinə keçirilib və heç bir əməliyyatlara cəlb olunmayıb. Bununla əlaqədar, bütün maşın və mexanizmlər sazlanıb işlək vəziyyətə gətirilməlidir.
Şirkətdən həmçinin əlavə edilib ki, müvafiq gəmiçilik registri tərəfindən müəyyən edilmiş gəmilərin baş mühərriklərinin icbari cari təmir vaxtı yaxınlaşmaq üzrədir: "Odur ki, registrin tələb etdiyi bütün bu kimi işlər müəyyən olunub yerinə yetirilməlidir. Həmçinin, bu tip gəmilərin Volqa-Don su kanalı vasitəsilə Xəzər dənizinə gətirilməsi və kanal boyunca nəqliyyat körpülərinin altından maneəsiz keçirilməsi üçün kapitan körpüsü və dirəklərin sökülməsi, elektrik, kommunikasiya və digər xətlərin kəsilib işarələnməsi məcburiyyəti ilə üzləşməli olacaqlar. Gəmilərin hissələrini yedək və bərələrlə Xəzər dənizinə çatdırıldıqdan sonra isə kəsilmiş və ayrılmış hissələr müvafiq qaydada birləşdirilib bərpa olunmalıdır. Göründüyü kimi, gəmiləri tam işlək vəziyyətə çardırmaq üçün bir sıra mühüm və texniki cəhətdən mürəkkəb işlər görülmədir. Bu isə həm vaxt, həm də ki xeyli maliyyə vasaiti tələb edir. Qış ayları boyunca Volqa-Don kanalı donduğu üçün gəmilərin 4 ay müddətində Türkiyədə saxlanılması gözlənilir. "CMS" gəmilərinin aşağı qiymətlə alınmasına nail olub, yuxarıda qeyd olunan işləri nəzərə aldıqda ilkin hesablamalara görə, gəmilərin hər birinin yekun dəyəri 10,5 mln. dollardan aşağı olmayacaq. Şirkət gəmilərin eyni zamanda Xəzərdən kənar sularda üzməsini də nəzərdə tutur".
