Aktual mövzular: Dollar alış-satışı , Hava haqqında, Məzənnə, Neftin qiyməti

Azərbaycan basketbol yığmasının bazası yoxdur

Azərbaycan basketbol yığmasının bazası yoxdur

Date: 15 November 2016 12:32

Bakı. 15 noyabr. REPORT.AZ/ Bu gün basketbol üzrə Azərbaycan milli komandasının yeni baş məşqçisi Samit Nuruzadə Milli Olimpiya Komitəsində mətbuat konfransı keçirib. 
"Report"un məlumatına görə, gənc mütəxəssis əvvəlcə ölkədə basketbolun inkişafı istiqamətində görüləcək işlərdən danışıb. O deyib ki, qarşısına yeniyetmə basketbolçuların inkişafına nail olmaq məqsədi qoyulub: "Məndən əvvəl vəziyyət fərqli idi. Hazırda 5 illik inkişaf proqramı hazırlanıb. Bu proqramı bir neçə mərhələyə bölə bilərik. Bu işi ağac hesab etsək, 5 ildən sonra yaxşı meyvə almaq üçün suyunu, gübrəsini bol etməliyik. Yığma üçün basketbolçular yetişdirməliyik. İlk növbədə, məktəb basketbolunu inkişaf etdirməliyik. Hazırda bu var, amma inkişaf getməlidir. İkincisi, U-14, U-16 və U-18 komandaları üçün istedadlı uşaqlar toplamalı, onlarla daha çox çalışmalıyıq. Üçüncüsü, komandaların, yarışların, oyunların sayı artırılmalıdır. Dördüncüsü, gələn il Bakıda keçiriləcək IV İslam Həmrəyliyi Oyunlarında iştirak etməliyik. Beşinci məsələ gənclərdən ibarət komandalarımızın Avropa çempionatlarında çıxış etmələridir. Altıncısı, məşqçilərin sayı çoxalmalıdır. Nəhayət, 2020-ci il kişilərdən ibarət yığmamızın ili kimi qəbul olunmalıdır. Hər federasiyada çətinliklər var. Əl-ələ verib bunların öhdəsindən gəlməliyik".
Baş məşqçi daha sonra yığma komandaların nəticələrindən və görülən işlərdən söz açıb: "2015/2016 mövsümündə U-16 yaş qrupunda 9, U-14 yaş qrupunda 13 komandanın iştirakı ilə yarışlar keçilirib. Burada seleksiya işləri aparmışam. Mən gələn gündən seleksiya ilə məşğul oluram. Rumıniyanın "Styaua" komandasında oynayan azərbaycanlı 16 yaşlı basketbolçu var. İki idmançımız Gürcüstan çempionatında çıxış edir. Bizdə milliləşdirilmiş futbolçular var. Amma iki nəfərdən başqa hamısı Azərbaycan basketbolunun yetirməsidir. 2 gürcü, 9-10 yaşından Bakıda yaşayan 2 türk, 2 yaşından burada olan amerikalı basketbolçular var. U-16 və U-18-lə Avropa çempionatında çıxış etdik. Bundan əvvəl U-16 Xəzəryanı ölkələrin liqasına çağırılmışdı. İki tur artıq bitib. İndi daha iki tur qalıb. Biri Türkmənistanda, digəri Azərbaycanda olmalıdır. İndi Təşkilat Komitəsi ilə söhbətlər gedir. Nəticədə ikinci yerdəyik. Təhsil Nazirliyi, Gənclər və İdman Nazirliyi, Milli Olimpiya Komitəsinə təşəkkür edirəm. Bizim yarışlarda iştirak etməyimizə imkan yaradırlar. Bu il U-16 və U-18 Avropa çempionatının C qrupunda çıxış edib. U-16 birinci, U-18 isə ikinci olub".
S.Nuruzadənin sözlərinə görə, basketbolun inkişafı üçün ilk növbədə, məktəblərdən başlamaq lazımdır. O, yığma komandaların məşqi, Azərbaycanda basketbol yarışlarının keçirilməsi üçün bazanın olmamasından söz açıb: "Bizim məktəb zallarından çıxmaq fikrimiz yoxdur. Çünki materialımızı oradan götürürük. Məşqçilərin orada çalışması çox önəmlidir. Hər bir idman növündə olduğu kimi, bizdə də problem var. Məsələn, bazamızın olmaması. Ancaq bu, şikayət deyil, problemin öhdəsindən gəlirik. Yaxşı olardı ki, öz bazamız olsun. Azərbaycanda basketbol zalları çoxdur. Maddi kömək məsələlərinə 5 illik inkişaf proqramından sonra baxılacaq. Hansı səbəblərəsə görə bizim milli çempionatımız o qədər də güclü deyil, amma iş aparılır. Gəncləri gücləndirsək, çempionatımız da güclü olacaq. 4-5 ildən sonra çempionatımızın əvvəlkindən də yaxşı olduğunu görəcəksiniz. Ölkə çempionatında bölgələrdən "Araz Naxçıvan" iştirak edir. Ancaq regionlarda məhz uşaqlar üçün yarışlar keçirilir. Çünki siyasətimiz gənclərlə bağlıdır. Universitetlərin komandalarının olması, Azərbaycan çempionatında iştirakları çox gözəl olardı. Amma tələbələr arasında çempionat var. Bu, qarşımıza qoyulan böyük suallardan biridir. Bu barədə söhbətlər olur və bunu davam etdirəcəyik. Ancaq indi daha gənc idmançıların inkişafından söhbət gedir. Üstəlik, komandalar üçün xaricdə təlim-məşq toplanışları nəzərdə tutulub. Bu, inkişaf üçün çox önəmlidir".
Bundan başqa baş məşqçi Azərbaycan basketbolçularının xarici klublarda çıxış etmələri istiqamətində görülən işlərdən də danışıb: "İspaniyada da çalışmışam. Onlar orta boyludurlar, bizimkilərdən daha alçaqdırlar. Bizim U-16 komandalarımızda problem ucaboylularla bağlıdır. Balaca boylularda problem yoxdur. Ender Polad Çexiya klubundadır. Əkbər Məmmədovun qolunda zədə var. Zədəsini sağaltdıqdan sonra o da Çexiyaya getməlidir. Avropada qazandığımız nəticələrə görə bizdə basketbola diqqət ayrılır. Fikrimcə, kütləviliyə görə basketbol Azərbaycanda ikinci yerdədir. Əgər əvvəl 10 nəfərdən 2-si basketbola gəlirdisə, indi hər 10 nəfərdən 4-ü gəlir".


Tags:  Azərbaycan basketbol yığmasının bazası yoxdur

RƏYLƏR


Top news