Aktual mövzular: Dollar alış-satışı , Hava haqqında, Məzənnə, Neftin qiyməti

Yanan binanın məhkəməsindən: "Sifarişi rəisidən alırdım"

Yanan binanın məhkəməsindən: "Sifarişi rəisidən alırdım"

Date: 15 November 2016 13:19

Xətai rayonu ərazisindəki 9 mərtəbəli yaşayış binasında baş verən yanğın hadisəsi ilə bağlı təqsirləndirilən Fərid Sadıqov, Zaur Əşrəfov və Nüsrət Muxtarovun cinayət işi üzrə məhkəmə prosesi davam edib.

 

Lent.az-ın məlumatına görə, Bakı Ağır Cinayətlər Məhkəməsində hakim Eldar İsmayılovun sədrliyi ilə keçirilən prosesdə Xətai rayon icra başçısının müavini olmuş Qafur Rəhmanov şahid qismində ifadə verib. O, ifadəsində bildirib ki, əvvəllər Mənzil Kommunal Təsərrüfatı Birliyinin (MKTB) rəhbəri olub:

 

"Yanğın baş verən binada üzləmə işləri aparılarkən mən ərazidə təmizlik işlərinə nəzarət etmişəm. Yanan bina balansımızda deyildi, Bakı Şəhər Departamentinin balansında idi. Binanın fasadlanması işləri Bakı Şəhər İcra Hakimiyyətinin sifarişi ilə aparılırdı Bina yanandan sonra vətəndaşları qəbul edildi. Orda idim. Mənzilləri tam yanan və qismən zərər görənlər qəbula gəlirdi. Mənzilləri tam yananlara birdəfəlik maddi yardım verildi". Prosesdə TNH şirkətinin əməkdaşı olmuş Oruc İsmayılov şahid qismində dindirilib. O, bildirib ki, şirkətdə qeyri-rəsmi olaraq çalışıb:

 

"Zığ yolunda üzlənən binalara lazım olan materialları mən aparırdım. Sifarişi sahə rəisindən alırdım. Mühasibatlıqdan pulu alıb, bazara gedirdim. Nə lazımdısa onu alırdım". Məhkəmədə sənədlərin tədqiqi mərhələsinə keçilib. Proses noyabrın 22-də davam edəcək.

 

Qeyd edək ki, hadisə keçən il aprelin 10-da Xətai rayonu, Zığ yolu küçəsi 16 saylı ünvanda baş verib. Həmin ünvanda “TNH” şirkəti tərəfindən fasadında “poliuretan” materialla üzləmə işləri aparılan doqquzmərtəbəli yaşayış binasında ağır nəticələrə səbəb olan yanğın qeydə alınıb. Fakt üzrə Baş Prokurorluğun Ağır cinayətlərə dair İşlər üzrə İstintaq İdarəsində Cinayət Məcəlləsinin müvafiq maddələri ilə cinayət işi başlanıb. Cinayət işi üzrə aparılan baxış, axtarış, götürmə istintaq hərəkətləri ilə “TNH” şirkətinin fəaliyyətinə, istehsal etdiyi “poliuretan” məmulatının keyfiyyət və istehsal texnologiyasına dair zəruri materiallar, həmçinin iş üçün əhəmiyyət kəsb edən digər sənədlər müvafiq qaydada maddi sübut kimi götürülüb. Ağırlaşdırıcı hallarda vəzifə səlahiyyətlərindən sui-istifadə edərək yanğın təhlükəsizliyi qaydalarını kobud surətdə pozaraq Xətai rayonu ərazisində yerləşən qeyd edilən yaşayış binasına və bina sakinlərinə külli miqdarda maddi ziyan vurulmasına səbəb olan əməllərinə görə “TNH” şirkətinin fəaliyyətinə və görülən işlərə faktiki rəhbərliyi həyata keçirən Fərid Sadıqov, şirkətin direktoru Zaur Əşrəfov, şirkət direktorunun tikinti işləri üzrə müavini Nüsrət Muxtarov Cinayət Məcəlləsinin 225.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə təqsirləndirilən şəxs qismində cəlb edilərək barələrində Nəsimi Rayon Məhkəməsinin qərarları ilə 4 ay müddətinə həbs qətimkan tədbiri seçilib. Təqsirləndirilən şəxslərdən Nüsrət Muxtarov Bakı İstintaq Təcridxanasında dünyasını dəyişib.


Tags:  Yanan binanın məhkəməsindən Sifarişi rəisidən alırdım


RƏYLƏR


Top news