Aktual mövzular: Dollar alış-satışı , Barselona - Real, Hava haqqında, Məzənnə, Neftin qiyməti

Rusiya ermənilərin regiondakı destruktiv davranışlarını gücləndirir

Rusiya ermənilərin regiondakı destruktiv davranışlarını gücləndirir

Date: 17 November 2016 09:22

Moskva birgə qruplaşma yaratmaqla ermənilərin regionda destruktiv davranışlarını gücləndirir.

Milli.Az xəbər verir ki, bunu Milli Məclisin Beynəlxalq münasibətlər və parlamentlərarası əlaqələr komitəsinin üzvü, politoloq Rasim Musabəyov bildirib.

O qeyd edib ki, regionda qüvvələr balansı baxımından birgə erməni-rus birləşmiş hərbi birliklərinin yaradılması nəticə etibarilə birbaşa az şeyi dəyişir: "Belə ki, nəticədə bir nəfər də əsgər, bir dənə də texnika sayı artmır. Məsələnin hərbi-siyasi tərəfinə gəlincə, onsuz da Rusiya ilə Ermənistan arasında ikitərəfli ittifaq var. Bundan əlavə, KTMT müqaviləsinə əsasən, Ermənistanın ərazisi hücuma məruz qalarsa, Moskva onu müdafiə etmək öhdəliyini üzərinə götürüb.

Yeri gəlmişkən, erməni tərəfi birgə hərbi qruplaşmanın yaradılması ilə heç də fərəhlənmir. Onların fikrincə, bununla Ermənistanın müstəqil qalmış yeganə artibutu - ordusu da Rusiyanın nəzarəti altına keçir. Axı Rusiya sərhədçiləri Ermənistan sərhədlərinin qorunmasını həyata keçirir, dövlət şirkətləri isə bu vassal ölkənin dəmiryolu, qaz və enerji, telefon şəbəkələrini və digər vacib müəssisələrini idarə edir. 

Birləşmiş qruplaşmanın erməni tərəfinə etibar edilməsi faktı heç kimi aldada bilməz.

Aydın görünür ki, Moskvanın və ya Rusiyanın Cənub Hərbi Dairəsinin birbaşa göstərişi olmadan rus hərbçiləri İrəvanın heç bir əmrini yerinə yetirməyəcəklər. Belə olan halda birgə qruplaşma niyə yaradılır?"

Millət vəkilinin fikrincə, bunun bir neçə izahı ola bilər: "Əvvəla, Moskva Ermənistanda müşahidə olunan siyasi boşluq, qərb erməni diasporunun İrəvanın geosiyasi orientasiyasının rusiyapərəst vektorundan narazılığı şəraitində yerli silahlı qüvvələr üzərində nəzarəti gücləndirməyi vacib hesab edib. İkincisi, bu, əlavə silah göndərişləri ilə yanaşı, Rusiyanın Ermənistanın təhlükəsizliyinin zəmanəti baxımından öhdəliklərinə sadiqliyi kimi qələmə verilir. Əgər əvvəllər Rusiyanın Gümrüdəki 102-ci hərbi bazası Ermənistanı Türkiyə tərəfdən mümkün hərbi təzyiqlərdən qoruyurdusa, Rusiya hərbi hissələri ilə yanaşı Naxçıvanla sərhəddə perimetr boyu yerləşmiş erməni hərbi korpusunun daxil olduğu birgə hərbi qüvvələrin yaradılması isə Moskvanın bu istiqamətdən Azərbaycanın cavab hərbi əməliyyatları zamanı da erməniləri dəstəkləməyə hazırlığını nümayiş etdirməlidir.

Açıq görünür ki, əlavə hərbi texnikaların, xüsusilə "Smerç" reaktiv qurğularının və "İskəndər" OTRK-ların çatdırılması, eləcə də birləşmiş Rusiya-Ermənistan hərbi qruplaşmasının yaradılması Ermənistanın regionda destruktiv davranışlarını obyektiv olaraq gücləndirir. Elə bil ki, Moskva elan edir ki, hərbi əməliyyatlar bərpa olunacağı təqdirdə onlar mütləq Azərbaycan ərazisində aparılmalıdır. Belə çıxır ki, Ermənistanın silahlı qüvvələri Azərbaycana qarşı hansı oyundan çıxmalarından asılı olmayaraq, onların ərazisi qanuni cəzadan qorunur, təcrid edir. Bununla da Rusiya Ermənistanın regionda destruktiv davranışlarının məsuliyyətini öz üzərinə götürür".

Politoloq hesab edir ki, Moskvanın bu hərəkətləri ilə guya ermənilərin təhlükəsizlik baxımından narahatlıqlarını aradan qaldırması və bununla da onların işğal edilmiş Azərbaycan torpaqlarının bir hissəsini azad etməyə razılıq verməyə çalışması ilə bağlı səslənən mülahizələr tamamilə boş sözlərdir: "Praktikada biz bunun əksini görürük. Apreldəki hərbi uğursuzluqdan sonda güzəştlərə meyllənən Ermənistan rəhbərliyi Rusiyadan əlavə silah partiyası və hərbi zəmanət alandan sonra danışıqlardakı mövqeyini yalnız sərtləşdirib. Yaranan gerçəklik Azərbaycanı öz müdafiə qabiliyyətini gücləndirmək üçün cavab tədbirləri görmək üçün İsraildən, Pakistandan yeni silahlar almağa, eləcə də irimiqyaslı təlimlər keçirməyə məcbur edir.

Əgər Rusiyada kimsə güman edirsə ki, ermənilərə nümayişkaranə şəkildə verilən bu hərbi dəstəklə Bakı sülhə İrəvan və Moskvanın istədiyi şərtlərlə gedəcək, dərindən yanılırlar.

Prezident İlham Əliyev aprel döyüşləri zamanı ermənilərdən azad edilmiş Lələtəpədəki mövqelərimizdə növbəti dəfə birbaşa bəyan etdi ki, Azərbaycan öz ərazisində ikinci erməni dövlətinin yaradılmasına imkan verməyəcək və bir qarış torpağını da güzəştə getməyəcək".

Pünhan Mirzə

Milli.Az


Tags:  Rusiya ermənilərin regiondakı destruktiv davranışlarını gücləndirir

RƏYLƏR


Top news