Kiyev. 17 noyabr. REPORT.AZ/ "SOCAR-ın müştəriləri aldıqları məhsulun keyfiyyətinin ən yaxşı avadanlıqlardan istifadə edilməklə yoxlanmasından arxayın ola bilər".
Bunu "Report"a neft-qaz məhsullarının keyfiyyətinə nəzarət üçün laboratoriya avadanlıqlarının təchizatı üzrə ixtisaslaşan Ukrayna-İsveç şirkəti "SocTrade"in direktoru Aleksandr Pleve deyib.
A.Pleve bildirib ki, onun rəhbərlik etdiyi şirkət neft-qaz məhsullarının keyfiyyətinə nəzarət üçün laboratoriya avadanlıqlarının təchizatı ilə məşğul olur və bütün Ukrayna ərazisində stasionar və mobil laboratoriya təmin edə bilir: "Üç il bundan əvvəl şirkətimiz "SOCAR Energy Ukraine" üçün ilk dəfə avadanlıq tədarük etdi və bu əməkdaşlıq bu günə qədər davam edir. Biz qarşı tərəfə benzin və dizel yanacağının 40-dan çox keyfiyyət göstəricisini ölçə bilən Avstriya analizatoru təqdim etmişdik. İndi Odessa vilayətindəki neft bazasında bütün başverənlərə və yanacaqdoldurma məntəqələrinə yola salınan məhsullara nəzarət həyata keçirilir".
