Aktual mövzular: Dollar alış-satışı , İstanbulda terror, Hava haqqında, Məzənnə, Neftin qiyməti

2 klub Azərbaycan çempionatından qovulacaq - QUMARA GÖRƏ

2 klub Azərbaycan çempionatından qovulacaq - QUMARA GÖRƏ

Date: 17 November 2016 13:33

Birinci divizionda danışılmış oyunların say-hesabının olmaması ölkə mətbuatında dəfələrlə öz əksini tapıb. Faktlar da ortaya qoyulub, dəlillər də, ancaq “klublara gözün üstə qaşın var” deyən tapılmayıb. Vəziyyət o həddə çatıb ki, hətta FİFA-dan AFFA-ya rəsmi məktub göndərilib və bu olayların araşdırılması tələb olunub.

Artıq assosiasiya rəhbərliyi də Milli Məclisə müraciət edərək, danışılmış oyunların qarşısını almaq üçün qanun layihəsinin tətbiq edilməsini təklif edib. Vəziyyət elə bir həddə çatıb ki, Milli Məclis qısa zamanda bu qanunun qüvvəyə minməsi üçün “yaşıl işıq” yandırıb. İndi qalıb yalnız prezidentin imzalaması və bundan sonra “moşenniklər” qanun qarşısında cavab verməli olacaqlar.

Ancaq bu da son deyil. Məsələ burasındadır ki, İcraiyyə Komitəsində qəbul edilən qərara əsasən, klublar oyunların manipulyasiyasına qarşı mübarizə ilə bağlı hazırlanan Bəyannamə imzalamalı və bundan sonra nəinki özləri qara işlə məşğul olmamalarını, hətta bilib, gizlətdikdə belə məsuliyyətə cəlb olunacaqlarını təsdiqləmiş olurlar.

Artıq bu yöndə işlərə start verilib və ilin sonunadək bütün klubların bu Bəyannaməni imzalayacağı gözlənilir.

Nəhayət, ən şok məlumat: Qış fasiləsindən sonra divizion iştirakçılarının sayı azalacaq. Əldə etdiyimiz eksklüziv informasiyaya görə, FİFA-dan daxil olan geniştərkibli siyahı AFFA-nı əməli işə sövq edib. Əksər divizion klublarının iştirakı ilə keçirilən şübhəli oyunlar araşdırılmağa başlayıb. Assosiasiya rəhbərliyi bu dəfə “heç bir faktımız yoxdur” deməklə kifayətlənməyəcək.

Sərt üzünü göstərməyi planlaşdıran ölkənin ali futbol qurumu divizion iştirakçılarından ikisini çempionatdan xaric etməyi planlaşdırır. AFFA İcraiyyə Komitəsinin dekabrdakı iclasında konkret adlar açıqlanacaq.

Namizədlər sırasında öndə 4 komanda qərarlaşıb: “Şərurspor”, “Bakılı”, “Rəvan” və “Göyəzən”. Bu, heç də o demək deyil ki, yalnız bu 4 kollektiv danışılmış oyunlara gedib. Əsla! Siyahı o qədər zəngindir ki, “alverçi” adı ilə əksər klubları yola salmaq mümkündür. Lakin AFFA çempionatı dayandırmaq fikrində deyil. Bu üzdən də iki klubu kənarlaşdırmaqla “qızım deyirəm, gəlinim eşit” məsəlindən istifadə edir. Ancaq bu cür ciddi qərardan və oyun manipulyasiyasının nəzarətə götürülməsindn sonra çətin ki, adlarını çəkdiyimiz klubların sponsorları ölkə çempionatında iştirak etmək arzusunda olalar.

Yəqin ki, cari mövsüm başa çatdıqdan sonra divizionun əksər klubları tarixin yaddaşına köçmək qərarı verəcəklər. Çünki düzgün işləmək onlara görə deyil, qara işlərlə məşğul olmağın isə cəzası var. Klubların sıradan çıxmasına görə də üzülməyə dəyməz. Onsuz da ölkə futboluna xeyir verməyən belə klublar yalnız kimlər üçünsə qumar alətidir. (futbolinfo.az)


Tags:  klub Azərbaycan çempionatından qovulacaq QUMARA GÖRƏ

RƏYLƏR


Top news