Aktual mövzular: Dollar alış-satışı , Hava haqqında, Məzənnə, Neftin qiyməti

Akif Çovdarov: "Uşaqları buraxın, nə deyirsiniz edəcəm"

Akif Çovdarov: "Uşaqları buraxın, nə deyirsiniz edəcəm"

Date: 17 November 2016 17:13

Ləğv edilmiş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmənin hazırlıq iclası davam edir.

Baxış iclası Bakı Hərbi Məhkəməsinin hakimi Həbib Həsənovun sədrliyi ilə Sabunçu rayon Məhkəməsinin inzibati binasında baş tutub.

Prosesdə Akif Çovdarovun vəkilləri cinayət işinə xitam verilməsi, həbs qətimkan tədbirinin ləğv edilməsi, onun azadlığa buraxılması, tibbi ekspertiza təyin edilməsi, ekspertlərin xaricdən gətirilməsi barədə vəsatətlər veriblər.

Məhkəmə ekspertiza barədə vəsatəti qismən təmin edib. Bildirilib ki, ekspertiza təyin olunacaq, lakin xaricdən ekspertlər çağrılmayacaq.

Digər vəsatətlər təmin edilməyib.

Akif Çovdarov qısa çıxış edərək digər təqsirləndirilən şəxslərin azadlığa buraxılmalarını istəyib. Bildirib ki, onunla birlikdə mühakimə olunan şəxslərin günahı yoxdur: "Uşaqları buraxın, nə deyirsiniz edəcəm, sənədlərə də qol çəkəcəm. Onların heç bir günahı yoxdur. Mənə də hökm oxuyun".

Bundan sonra iş üzrə məhkəmə baxşının başlanmasına qərar verilib. Prokuror ittiham aktını elan etməyə başlayıb.

Proses davam edir.

İttihama görə, cinayət işi üzrə 320-dən çox şahid, 60-dan çox isə zərərçəkmiş var. Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər Akif Çovdarov, Səlim Məmmədov, Akif Əliyev və Orxan Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub.


Tags:  Akif Çovdarov Uşaqları buraxın deyirsiniz edəcəm

RƏYLƏR


Top news