Məşhurların yaradıcılıqları kimi taleləri də maraqlı, bəzən də keşməkeşli olur. Bilmirəm, bu yaxşıdır, yoxsa pis, amma bəzən son mənzilini də özün yox, rəsmi qurumlar müəyyən edir. Daha doğrusu, son mənzilin ünvanını. Məsələn, olursan Fəxri Xiyabanın əbədi sakini... Bəzən isə layiq olduğun halda oranın sakini olmaq mümkünsüzləşir...
Milli.Az xəbər verir ki, ölkə.az-ın araşdırmasında məhz Fəxri Xiyabanda dəfn olunmayan məşhurlardan söhbət açılıb. Beləliklə...
55 yaşında dünyasını dəyişmiş xalq artisti Məmmədbağır Bağırzadə 2005-ci ildə vəfat edib. Məzarı Nardaran qəbiristanlığındadır.
Hətta deyilənə görə, Bağırzadəni İkinci Fəxri Xiyabanda dəfn etmək istəyirmişlər. Amma son anda atası buna razı olmayıb.
Ötən il 57 yaşında qəfil ürək tutmasından vəfat edən tanınmış aktyor, xalq artisti İlham Əsgərov da ata-baba yurdunda - Masallı rayonunun Xoşçobanlı kəndində dəfn edilib. Ancaq görünən bu idi ki, ailəsi onun Bakıda dəfn olunmasını istəyirdi. İlham Əsgərovun həyat yoldaşı Yeganə Əsgərova:
"Biz istəyirdik ki, İlham Əsgərov Bakıda dəfn olunsun. Heç olmasa qəbri üstə vaxtı-vaxtında gedək, ziyarət edək. Amma onun Bakıda dəfn olunmağına imkan vermədilər. İlhama qarşı daha bir laqeydlik gördük. Gərək, bunu dövlət fikirləşərdi, fikirləşmədi... Məcbur olub Masallıya apardıq. O boyda sənətkar getdi, elə bil heç nə baş vermədi. Bu, dəhşətdir... Bu boyda laqeydlik, bu boydə səriştəsizlik, bu boyda hörmətsizlik olmamalıydı, amma oldu. Görəsən, o Mədəniyyət və Turizm Nazirliyi bu munasibətin məsuliyyətini hiss edirmi?"
Məşhur aktyor Əliağa Ağayev isə sovet dövründə partiya üzvü olmaqdan imtina etdiyi üçün onu Fəxri Xiyabana layiq görməyiblər. 1983-cü ildə vəfat edən sənətkarın məzarı Yasamal qəbiristanlığındadır.
Əliağa Ağayevlə eyni qəbiristanlıqda 41 yaşında səhnədə həyatını itirən dünyaca məşhur cazmen Vaqif Mustafazadə də uyuyur.
Mustafazadə ilə eyni yaşda həyata əlvida deyən tanınmış aktyor Səməndər Rzayev də bu qəbiristanlığın sakinidir.
Yasamal qəbiristanlığından söz düşmüşkən, bu məzarlıq Rübabə və Mahrux Muradova bacılarının, həmçinin xalq artisti Gülşən Qurbanovanın da son mənzilidir.
Tanınmış teatr və kino aktyoru, xalq artisti Eldəniz Zeynalov da Fəxri Xiyabanda dəfn edilməyib.
Müğənni-xanəndə Nəzakət Məmədovanın məzarı isə Gəncə şəhərindədir.
Bir sıra məşhur qələm adamları var ki, onlar da ya vəsiyyətlərinə uyğun olaraq, ya da qeyd etdiyimiz kimi naməlum səbəblərdən Fəxri Xiyabanda torpağa tapşırılmayıblar.
Məsələn, xalq yazıçısı Sabir Əhmədli Binəqədi qəbiristanlığında dəfn edilib.
Bu məzarlıqda həmçinin həkmarı Fərman Kərimzadə də uyuyur.
Xalq yazıçısı Əbülhəsən Ələkbərzadə isə öz vəsiyyətinə uyğun olaraq 1986-cı ildə İsmayıllının Basqal kəndində torpağa tapşırılıb.
Xalq yazıçısı Əzizə Cəfərzadə də 2003-cü ildə öz vəsiyyyəti ilə Hacıqabulda dəfn edilib.
Məşhur müğənni Oqtay Ağayev də 2006-cı ildə vəfat edib. Bacısı oğlu Fuad Novruzovun dediklərindən:
"Həyat yoldaşı Nadejda xanımın qəbri Qurd Qapısı yaxınlığındakı qəbiristanlıqdadır. Oqtay Ağayev isə Yasamal qəbiristanlığında, anasının yanında dəfn olunub. Onun Fəxri Xiyabanda dəfn olunmağı bizdən asılı məsələ deyildi. Amma o, birbaşa xalq artisti adını alan üç nəfərdən biridir. 2000-ci ilin yanvarında Heydər Əliyev ona bu adı verdi".
Dövlət Musiqili Teatrının tanınmış simalarından olan xalq artisti Elxan Əhədzadə də Fəxri Xiyabanda dəfn edilməyib. 2010-cu ildə 62 yaşında dünyadan köçən güclü səs sahibi Xırdalan qəbiristanlığında torpağa tapşırılıb.
Bir zamanların ən güclü səsi, Azərbaycan musiqisinin gələcəyi hesab edilən müğənni-xanəndə Elçin Cəlilov isə 2005-ci ildə 37 yaşında rəhmətə gedib. Məzarı Mehdiabad qəbiristanlığındadır.
Müğənni-xanəndə, əməkdar artist Məhəbbət Kazımov isə Xırdalan qəbiristanlığında uyuyur.
Məşhur xanəndə Sabir Mirzəyev də Bakıdakı qəbiristanlıqların birində dəfn olunub. Görünür, əməkdar artist olduğuna görə Fəxri Xiyabanda dəfn edilməyib. Xatırladaq ki, 1943-cü ildə Cəlilabadda dünyaya gələn sənətkar 68 yaşında Təbrizdə vəfat edib.
Milli.Az 
