Aktual mövzular: Dollar alış-satışı , İstanbulda terror, Hava haqqında, Məzənnə, Neftin qiyməti

Sovet kinosunun ulduzlarından bayram - FOTO

Sovet kinosunun ulduzlarından bayram - FOTO

Date: 18 November 2016 18:05

Teatral oxucularımız bilməmiş deyillər ki, artıq iki gündür V.V.Mayakovski adına Moskva Akademik Teatrı paytaxtımızda qastrol səfərindədir. Azərbaycan Respublikası Mədəniyyət və Turizm Nazirliyi və Rusiya Federasiyası Mədəniyyət Nazirliyinin "Böyük qastrollar-2016" qastrol proqramı çərçivəsində həyata keçirilən səfər çərçivəsində qocaman teatr kollektivi dünən S.Vurğun adına Rus Dram Teatrının səhnəsində mərhum rejissor Serqey Arçibaşevin quruluşunda N.V.Qoqolun "Evlənmə" əsərinin tamaşası ilə çıxış etdilər. Bu axşam bu səhnə əsəri təkrar oynanılacaq. Noyabrın 19-20-si tarixlərində isə moskvalı aktyorlar Mindauqas Karbayskisin quruluş verdiyi Maryus İvaşkyaviçusun "Rus romanı" əsərinin tamaşasını təqdim edəcəklər. "Rus romanı" Lev Nikolayeviç Tolstoy və xanımı Sofya Andreyevnanın timsalında ədibin həyatının, yaradıcılığının, xüsusən də "Anna Karenina" romanının özünəxas tədqiqidir. Qeyd olunmalıdır ki, qastrol proqramı xüsusi diqqətlə tərtib olunub. Elə təkcə "Evlənmə" səhnə əsərinin yüz dəfələrlə oynanılmasını qeyd etmək kifayətdir. Bu tamaşada rolları Svetlana Nemolyayeva, İqor Kostolevski, Zoya Kaydanovskaya, Mixail Filippov, Rasmi Cəbrayılov, Dmitriy Prokofyev, Yevgeni Paramonov, Konstantin Konstantinov, İqor Marıçev, Oksana Kiselyova, Viktor Dovjenko, Andrey Qusev və başqaları ifa edirlər.

"Rus romanı" tamaşasında isə əsas rollarda Yevgeniya Simonova, Tatyana Orlova, Aleksey Dyakin, Vera Panfilova, Serqey Udovnik, Yuliya Solomatina, Maya Polyanskaya kimi aktyorları görə biləcəyik.

* * *

Onlar həqiqi "ulduz" kimi yalnız peşəkarlıqları ilə parlayan və buna görə də ünsiyyətdə süni pafosdan, xudbinlikdən çox-çox uzaq olan əsl sənətkarlardır. Milli.Az olaraq kifayət qədər intensiv kino karyerası olan Rusiyanın xalq artisti Svetlana Nemolyayevadan nə vaxtsa Bakı kinostudiyasından dəvət alıb-almaması və ölkəmizlə bağlı təəssüratlarını xəbər aldıq:

S.Nemolyayeva:

"Keçmiş SSRİ-nin bir çox kinostudiyalarında çəkilsəm də, ya da sınaq çəkilişlərində iştirak etsəm də, Bakı kinorejissorları nədənsə məni heç vaxt dəvət etməyiblər. Amma əvəzində bununla artıq ikinci dəfədir ki, teatrımızın tamaşası ilə Bakıda qastroldayıq. Birinci dəfə 1990-cı illərin əvvəllərində mərhum həyat yoldaşım Aleksandr Lazarevlə birlikdə oynadığımız "Kruq" tamaşasını gətirmişdik. Mərhum Heydər Əliyev də tamaşaçılar arasında idi və heç yadımdan çıxmaz, o, mənə qırmızı qızılgüllərdən ibarət böyük gül dəstəsi hədiyyə etmişdi. Həmin anda yoldaşım onu da səhnəyə dəvət etmişdi... Çox maraqlı, unudulmaz anlar idi... Yaxşı ki, fotolar qalıb...

* * *

Rusiyanın xalq artisti Iqor Kostolevski isə Bakıdakı dostlarından və ümumiyyətlə, sənət adamları arasındakı əlaqələrin əhəmiyyətindən danışdı:

"Saytınız vasitəsilə dostum, ən yaxşı diktor və aparıcılardan biri Rafiq Hüseynliyə salam göndərirəm. O, həm də çox gözəl insandır. "Tehran-43" filminə çəkiləndə Bakıda keçirdiyim günləri çox yaxşı xatırlayıram. Rafiq məni olduqca yaxşı qəbul etmişdi. Vaxtımızı çox yaxşı keçirirdik. Sonuncu dəfə Bakıda 1986-cı ildə "Qanuni nikah" filminin çəkilişlərində də Bakıda da olmuşam. Bakı unikal şəhərlərdən biridir. Gözəl həyat yaşamaq üçündür. Memarlığı qeyri-adidir. Paytaxtınızda müxtəlif xalqlara, ölkələrə aid məhəllələrin olması isə ab-havanı daha da gözəlləşdirir. Özü də bu məhəllələr ümumi mədəni ənənələrlə səsləşir, uyğunlaşır, bax, bu çox yaxşı təəssürat doğurur.

Əlbəttə, Azərbaycanın teatr və kino sənəti haqqında vaxtaşırı məlumatlar gəlib-çatır bizə. Rus Dram Teatrınız da Moskvaya qastrola gəlmişdi. Amma təbii ki, daha çox məlumatlı olmaq, daha sıx ünsiyyətdə olub daha yaxından dostluq etmək istərdik. Çünki belə münasibətlər istənilən halda yaxşılığa doğru nələrinsə baş verməsinə şübhəsiz ki, daha böyük töhfə verir nəinki siyasi əlaqələr..."

Samirə Behbudqızı
Milli.Az










Tags:  Sovet kinosunun ulduzlarından bayram FOTO

RƏYLƏR


Top news