Bu gün futbol üzrə Azərbaycan Premyer Liqasında 12-ci tura yekun vurulub.
Publika.az xəbər verir ki, ikinci oyun günündə turnir cədvəlinin qonşu pillələrində qərarlaşan “Sumqayıt” və “Neftçi” üz-üzə gəlib. Görüş “Sumqayıt”ın 2:0 hesablı qələbəsi ilə başa çatıb.
Samir Abasovun komandasının heyətində 3-cü dəqiqədə Amit Quluzadə və 75-ci dəqiqədə isə Mirabdulla Mirabbasov fərqləniblər.
Beləliklə, üç xal sayəsində “Sumqayıt” 13 xalla beşinci pilləyə yüksəlib. Elxan Abdullayevin komandası isə 9 xalla yeddinci yerdədir.
Turun son oyununda turnir cədvəlinin üçüncü pilləsində qərarlaşan “İnter” autsayder “AZAL”ı sınağa çəkib. Paytaxt derbisində sevinən tərəf meydan sahibləri olub - 3:0.
“İnter”in heyətində 22-ci dəqiqədə Ruslan Abışov, 56-da İlkin Qırtımov və 65-də isə Slavik Alxasov fərqləniblər.
Beləliklə, “İnter” üçüncü pillədəki yerini möhkəmləndirib, “Təyyarəçilər” isə 4 xalla sonuncu yerdə qərarlaşıblar.