Aktual mövzular: Dollar alış-satışı , Hava haqqında, Məzənnə, Neftin qiyməti

Dəhşətli yanğınla bağlı məhkəmə davam edir

Dəhşətli yanğınla bağlı məhkəmə davam edir

Date: 22 November 2016 13:39

Binəqədi rayonunda 16 mərtəbəli binada baş vermiş dəhşətli yanğınla bağlı həbs olunmuş “Qlobal Stone” MMC-nin baş direktoru Uğur Bəşirov, “Global Construction” MMC-nin təsisçisi və idarə heyətinin sədri Miryusif Mahmudov, Binəqədi rayon icra hakiminin sabiq müavini Qəzənfər Novruzov və digər şəxslərin cinayət işi üzrə məhkəmə prosesi davam edib.


Lent az-ın məlumatına görə, Bakı Ağır Cinayətlər Məhkəməsində hakim Əfqan Hacıyevin sədrliyi ilə keçirilən prosesdə əlavə şahid qismində Namiq Əliyev ifadə verib.

O, ifadəsində bildirib ki, 2007-ci ildən "Global Construcion"da texniki şöbənin rəisi olub:

 

"İstanbul Texnik Universitetinin məzunuyam. Bakıda müxtəlif şirkətlərdə çalışmışam. 2007-ci ildə "Global Construcion"a gəldim. 2 ay sınaq keçib, vəzifəmi icra etməyə başladım. İşlədiyim dövrdə bütün görülən işlər beynəlxalq standartlara uyğun aparılıb. İSO-nun 2 sertifikatını almışıq. İşlərin keyfiyyəti həm sahədə həm də ofisdə yoxlanılırdı. Şirkətin təsisçiləri Miryusif və Hüseynbala müəllim olub. Onlar bizə heç zaman göstəriş verməyib. Şirkəti ümumi şöbələr idarə edirdi. Təsisçilər yalnız illik tədbirlərdə gəlirdilər, bizi motivasiya edirdilər".


Hadisə zamanından danışan şahid bildirib ki, həmin vaxt ofisdə olub: "Yanğınla bağlı xəbəri internetdən aldım. Durub hadisə yerinə getdim. Həmin yerdə ofisin digər əməkdaşları da vardı. Onlar mənə ofisin bağlandığını dedilər. Bildim ki, ofisi MTN mühasirərəyə alıb və heç kimi içəri buraxmırlar".

Namiq Əliyev onu da qeyd edib ki, istintaq zamanı da ifadə verib.


Məhkəmə prosesi sabah saat 10 qədər fasilə elan edib. 




Qeyd edək ki, keçən il may ayının 19-da paytaxtın Binəqədi rayonu ərazisində çoxmərtəbəli yaşayış binasında ağır nəticələrə səbəb olan yanğın hadisəsi baş verib. Yanğın nəticəsində 15 nəfər ölüb, 50 nəfər xəsarət alıb.

Qulluq mənafeləri tələb etdiyi halda səlahiyyətlərindən istifadə etməmələri nəticəsində vətəndaşların və dövlətin hüquqlarına və qanunla qorunan mənafelərinə mühüm zərər vurmalarında kifayət qədər əsaslar olduğundan binanın üzlənməsində istifadə olunan “poliuretan” məmulatını istehsal edən “QlobalStone” MMC-nin baş direktoru Bəşirov Uğur Firuz oğlu, “Global Construction” MMC-nin təsisçisi və idarə heyətinin sədri Mahmudov Miryusif Mircəfər oğlu, həmin cəmiyyətin İdarə Heyətinin sədr müavini Əsgərov Ələkpər İldırım oğlu, Binəqədi rayon İcra Hakimiyyəti başçısının sabiq birinci müavini Novruzov Qəzənfər Məhərrəmoğlu, 2012-2013-cü illərdə Binəqədi rayon Mənzil Kommunal Təsərrüfat Birliyinin rəisi işləmiş rayon İcra HakimiyyətininTəsərrüfat şöbəsinin müdiri Rəcəbov Ədalət Şəmsəddin oğlu, Binəqədi rayonu, 72 saylı Mənzil Kommunal İstismar Sahəsinin rəisi Orucov Nizami Qara oğlu Cinayət Məcəlləsinin 225.2 (yanğın təhlükəsizliyi qaydalarını pozma ehtiyatsızlıqdan zərərçəkmiş şəxsin ölümünə və digər ağır nəticələrə səbəb olduqda) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə, “poliuretan” məmulatlarının sınaq yoxlamalarını keçirən “Dərnəgül Boru Zavodu” Qapalı Səhmdar Cəmiyyətinin sınaq laboratoriyasının müdiri Məmmədov Ağacavad Hacı oğlu Cinayət Məcəlləsinin 308.2 və 313-cü (vəzifə saxtakarlığı) maddələri ilə, “poliuretan” məmulatlarına dair texniki şərtləri razılaşdırmış Səhiyyə Nazirliyinin Gigiyena və Epidemiologiya Mərkəzinin baş direktoru Əlibəyov Akif Muradəli oğlu Cinayət Məcəlləsinin 308.2-ci maddəsi ilə təqsirləndirilən şəxs qismində cəlb olunaraq onlara həmin maddələrdə nəzərdə tutulan ittihamlar elan edilib.

A.Əlibəyov və A.Məmmədov barəsində isə həbs qətimkan tədbiri seçilməyib.


Tags:  Dəhşətli yanğınla bağlı məhkəmə davam edir


RƏYLƏR


Top news