Aktual mövzular: Dollar alış-satışı , Hava haqqında, Məzənnə, Neftin qiyməti

İnsanların dinlənilməsinə icazə verən qanuna REAKSİYA

İnsanların dinlənilməsinə icazə verən qanuna REAKSİYA

Date: 23 November 2016 17:53

Böyük Britaniyada kiber-təhlükəsizlik haqqında yeni qanun qəbul edilib.

Birləşmiş Krallığın qanunverici palatası tərəfindən qəbul edilən sənəd hökumət orqanlarının bütün vətəndaşların, hətta barələrində rəsmi araşdırma olmayan şəxslərin internet və telefon məlumatlarına girişini təmin edir.

“Araşdırma Səlahiyyətləri haqqında” qanun bu ilin sonunadək qüvvəyə minəcək.

Kibertəhlükəsizlik haqqında qanun aşağıdakı müddəaları nəzərdə tutur.

- Rabitə və informasiya operatorları şifrələrini silməli və vətəndaşlara aid informasiyalara daxil olmaq üçün hökumət strukturlarına kömək etməlidir.

- Polis və başqa hüquq-mühafizə orqanları istifadəçi interfeysi vasitəsilə bu informasiyalara giriş əldə edə, şübhəli və şübhəli olmayan şəxslərin profillərində axtarış apara bilərlər

- İnternet provayderlər hər bir istifadəçinin axtarışının tarixini bir il ərzində qeydə almalıdır

- Mühafizə xidmətlərinə dövlət və şəxsi məlumat bazalarında araşdırmalar aparmağa icazə verilir

- Dövlət orqanları informasiyanı toplu şəkildə ala bilərlər

- Səlahiyyətli polislər və başqa orqanlar bu şərtlər altında istifadəçilər haqqında şəxsi informasiyanı ala bilərlər.

Məsələ ilə bağlı “Multimedia” İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz Publika.az-a açıqlamasında sözügedən qanunun problemlər yarada biləcəyini söyləyib.

O.Gündüz deyib ki, istənilən ölkədə elektron izləmə halları mövcuddur:

“Xüsusilə də 2001-ci ildə ABŞ-da baş verən terror aktından sonra internetə nəzarətlə bağlı qanunlar daha da sərtləşdirilib. Bu addımlar ən demokratik ölkələrdə belə atılır. Amma eyni zamanda insan hüquqlarının qorunması məsələsi də nəzərə alınmalıdır. Misal üçün, istənilən insanı izləmək üçün məhkəmənin mütləq qərarı olmalıdır. Hesab edirəm ki, sözügedən qanundan sonra Böyük Britaniyada insan hüquqları ilə bağlı problemlər çıxa bilər. Çünki bu qanunla hüquq mühafizə orqanlarının əlinə böyük səlahiyyətlər verilir və həmin səlahiyyətlərdən başqa məqsədlər üçün də istifadə oluna bilər. Dünya təcrübəsi də göstərir ki, hətta, məhkəmənin icazəsi ilə telefon və internet üzərində dinləmə aparıldığı təqdirdə belə sui-istifadə halları mövcud olub. Bu isə sonradan böyük problemlər yarada bilər”.

O.Gündüz sözügedən qanunun ciddi şəkildə işlənilməsinin vacibliyini vurğulayıb.

Milli Məclisin Hüquq siyasəti və dövlət quruculuğu komitəsinin üzvü, millət vəkili Vüsal Hüseynov isə Publika.az-a açıqlamasında bildirib ki, hər bir dövlətin təhlükəsizlik və insan hüquqları konteksində öz yanaşması mövcuddur:

“Ona görə də bu qanuna birbaşa demokratiya konteksində baxmaq doğru deyil. Böyük Britaniyada sözügedən qanun təhlükəsizlik baxımından qəbul edilib. Amma ümumi olaraq həmin qanun hüquqların məhdudlaşdırılması deməkdir. Hətta, bu qanunun qəbulu Avropa Konvensiyası və digər hüquqi təşkilatları ilə ciddi narazılıq yarada bilər. Çünki burada adi insanların da dinlənilməsindən söhbət gedir. Bu baxımdan da insan hüquqları konteksində Azərbaycan qanunvericiliyi həmin qanunun yanında çox yumşaqdır. Bizdə qanunlar daha çox adi insanların tərəfindədir. Ancaq Böyük Britaniyada həmin qanunu qəbul edənlərin yalnız bir arqumenti var ki, bu da təhlükəsizliklə bağlıdır. Hesab edirəm ki, bu dünyada yeni təcrübədir ki, tətbiq olunur. Ancaq yəqin ki, gələcəkdə bu təcrübədən çox ölkə istifadə edəcək”.

Vasif Həsənli


Tags:  İnsanların dinlənilməsinə icazə verən qanuna REAKSİYA


RƏYLƏR


Top news