Nazirlər Kabineti "Azərbaycan Respublikasında qiymətli metallarla əməliyyatların aparılması və əqdlərin bağlanması Qaydaları"nda dəyişiklik edib.
Milli.Az APA-ya istinadən xəbər verir ki, qiymətli metallara zərgərlik, digər məişət məmulatı və bu məmulatın qırıntıları istisna olmaqla, hər hansı növdə və halda olan qızıl, gümüş, platin və platin qrupundan olan metallar daxildir.
Qaydaya əsasən Milli Bank müvəkkil banklar tərəfindən qiymətli metallarla (bank metalları) əməliyyatlar və əqdlər aparılarkən bu Qaydaların və Milli Bankın digər normativ aktlarının tələblərinə riayət edilməsinə nəzarət edib. Dəyişikliyə əsasən isə bankların qiymətli metallarla əməliyyatlarına nəzarət bank nəzarəti çərçivəsində qanunla müəyyən edilmiş qaydada Maliyyə Bazarlarına Nəzarət Palatası tərəfindən həyata keçiriləcək.
Qeyd edək ki, bundan öncə noyabrın 11-də Milli Məclisdə "Qiymətli metallar və qiymətli daşlar haqqında" qanunun 16.3-cü maddəsinə dəyişiklik edilib. Dəyişiklik bankların qiymətli metallar və qiymətli daşlarla əməliyyatlarına nəzarətin bank nəzarəti çərçivəsində qanunla müəyyən edilmiş qaydada maliyyə bazarlarına nəzarət orqanı (Maliyyə Bazarlarına Nəzarət Palatası) tərəfindən həyata keçirilməsini nəzərdə tutub. Qanuna görə, bundan əvvəl bu səlahiyyət Mərkəzi Banka aid olub.
Milli.Az
