Bakı. 24 noyabr. REPORT.AZ/ AMEA-nın Memarlıq və İncəsənət İnstitutunun təşkilatçılığı ilə “Azərbaycan milli sirk sənəti - 70” mövzusunda respublika elmi-praktiki konfransı keçirilib.
"Report" xəbər verir ki, tədbirdə institutun direktoru Ərtegin Salamzadə, Bakı Dövlət Sirkinin direktoru Vaqif Bağırzadə, əməkdar artist Həsənağa Abbasquliyev, institutun kollektivi və başqaları iştirak ediblər.
Tədbirdə Azərbaycan sirk sənətinin tarixi, təşəkkül mərhələləri, müasir problemləri, inkişaf perspektivləri müzakirə olunub. “Azərbaycan peşəkar sirk sənətinin inkişaf yolları”, “Bakı Dövlət Sirkinin milli sirk sənətinin inkişafında rolu”, “Azərbaycan sirk pəhləvanları”, “Milli sirk sənətində musiqi", "Azərbaycan sirkində klounada”, “Azərbaycan milli kinosunda sirk ənənəsi”, “Azərbaycan illüziya sənətinin inkişaf yolları”, “Müasir Azərbaycan sirk sənəti dünya arenasında” mövzusunda məruzələr dinlənilib.
Konfransda “Bu, Azərbaycan sirkidir” sənədli filminin premyerası keçirilib.
Qeyd edək ki, dahi Üzeyir Hacıbəylinin təşəbbüsü ilə yaradılan Azərbaycan peşəkar sirk kollektivinin ifasında ilk milli sirk proqramının premyerası 1946-cı il iyunun 12-də Bakı Dövlət Sirkində oynanılıb.
