Nazirlik “Gözdən əlillər üçün səsli kitabxana” yaradır

Nazirlik “Gözdən əlillər üçün səsli kitabxana” yaradır
10:35 28 Noyabr 2016
Ölkə mətbuatı
A- A+

Rabitə və Yüksək Texnologiyalar Nazirliyi Məlumat Hesablama Mərkəzi tərəfindən GƏSK (Gözdən əlillər üçün səsli kitabxana) yaradılır. Artıq 100-dən çox kitab peşəkar səviyyədə səsləndirilərək kitabxana fonduna daxil edilib. Xüsusi telefon xidməti vasitəsilə (1541) kitabxana 24 saat ərzində avtomatik rejimdə fəaliyyət göstərəcək.

Bu cür xüsusi kateqoriyalı oxucular üçün hər gün adi kitabxanalara getmək çətindir. Lakin hər hansı bir audiokitabı görmə qabiliyyəti məhdud olan oxucu dinləyə bilər.

Elə bu məqsədlə fiziki imkanları məhdud olan insanları müxtəlif janr və üslublarda audiokitablarla təmin etmək üçün kitabxanada müxtəlif audiokitablar toplanıb. Audiokitabxana klassik və müasir Azərbaycan yazıçılarının əsərlərini Azərbaycan dilində və dünya klassiklərinin Azərbaycan dilinə tərcümə olunmuş əsərlərini özündə ehtiva edir.

Təqdim olunan audiokitabxananın unikallığı ondan ibarətdir ki, görmə qabiliyyəti məhdud olan insanlar üçün Azərbaycan dilində "danışan" kitab fondu formalaşacaq.

İstifadəçilər giriş kodu əldə edərək, evdən çıxmadan, müvafiq telefon nömrəsini yığmaqla, yeni sistemə qoşula biləcək.

Sistemə qoşulmaq, janrı, yazıçını, əsərləri seçmək və qulaq asmaq üçün giriş kodunu qeyd etmək vacibdir. İstənilən vaxt dinləməni dayandırmaq və bir müddət sonra dayandırılmış yerdən dinləməyə davam etmək mümkündür.

Gələcəkdə digər dillərdə də yeni kitabların bu kitabxanaya əlavə olunması nəzərdə tutulur.

Qeyd edək ki, "Bakutel-2016" İnformasiya-Kommunikasiya Texnologiyaları Sərgi-Konfransı çərçivəsində kitabxananın ilkin təqdimatı gözlənilir.



Xəbərin orijinal ünvanı: http://ictnews.az/read-44573-news-1.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR