Aktual mövzular: Dollar alış-satışı , Hava haqqında, Məzənnə, Neftin qiyməti

Ayaz Qasımovu səhvən daz edən stilist: "Rəşad məni otelin liftində yaxaladı..." - FOTO

Ayaz Qasımovu səhvən daz edən stilist: "Rəşad məni otelin liftində yaxaladı..." - FOTO

Date: 29 November 2016 12:52

Milli.Az futbolçuların və bir çox şou-biznes nümayəndələrinin saç ustası Cəmil Özkoçun ölkə.az-a müsahibəsini təqdim edir:

- Futbolçuları ətrafınıza necə topladınız?

- Mənim yanıma ilk gələn futbolçu Füzuli Məmmədov olub. Daha sonra Emin Quliyev və digərləri ilə işləməyə başladım. Onlar öz yoldaşlarına dedilər, belə-belə artım oldu. Hal-hazırda 40-dan çox futbolçu müştərim var. Onlardan bəziləri ilə dost olmuşuq. Artıq 11 ildir Bakıdayam, 8 ildir də futbolçularla və digər tanınmış insanlarla çalışıram.

- Müştəriləriniz sırf futbolçulardan ibarətdir, ya sənət adamları da var?

- Yox. Futbolçulardan əlavə, şou-biznes nümayəndələrindən də yanıma gəlirlər. Bundan əlavə, dövlət işçiləri, məmurlar da mənə müraciət edirlər. Şou-biznesdən Fərda Xudaverdiyev, Vasif Məhərrəmli, Ayaz Qasımov, Samir Piriyev, Ədalət Şükürov, Elçin Hüseynov kimi similarla çalışıram.

- Ən ürəyiaçıq və ən xəsisi kimlərdir?

- Müğənnilərdən Ədalət Şükürov çox ürəyiaçıqdır. Vüqar Nadirov, Asif Məmmədov xəsisdir. (gülür) Futbolçulardan isə Maksim Medvedyev, Ansi Aqolli əliaçıqdır. Vüqar isə pulu deyinə-deyinə verir.

- Bəs kimlər daha çox kaprizlidir?

- Vasif Məhərrəmli çox kaprizlidir. Çox yorur adamı. Ona heç nə bəyəndirmək olmur. Saçı az olmasına baxmayaraq Vasif Məhərrəmli çox incidir. Ədalət Şükürovla çox rahat işləyirəm. Vüqar Nadirova heç nə bəyəndirmək olmur. Hər dəfə bir şəkillə gəlir yanıma ki, saçımı bu formada elə. Bir müddət öncə Ronaldunun, sonra isə Tarkanın şəklini gətirmişdi. Dedim ki, qardaş, bu səndə alınmaz. Mənim məsləhət gördüyümü bəyənmir. Cavid Hüseynov da tez-tez yanıma gəlir. Çox dəyişilib. Ruslan Abışov tez-tez yeni stilə keçənlər sırasındadır. Qara Qarayev də qaraqabaqlıq edir, heç nəyi bəyənmir tez. O, məni boğaza yığıb. (gülür) Əfran İsmayılovun isə saçını düzəltmək çox çətindir. Onun saçını qırxıram, yuyub-quruduram, sonra yenə qırxıram, nəhayət, əmələ gəlir. Müştərilərim arasında heç bir fərq qoymuram, çünki onlar mənim üçün əzizdirlər.

- Müğənnilərdən kiminləsə konflikt yaşadığınız olubmu?

- Ayaz Qasımov yanıma gəlmişdi. Demişdi ki, saçımı qısa elə. Mənim də başım qarışıq olmuşdu. Elə bilmişəm ki, deyib təmiz götür saçımı. Mən də saçını təmiz götürdüm. Sonra aramızda problem oldu. 4-5 saat söz-söhbət yaşadıq. Sonra yoluna qoyduq. Hal-hazırda da gəlir.

- Adətən bərbərlər müştəriləri üçün təyin etdiyi vaxtda boş olmurlar və müştərini gözlədirlər...

- Elə də olur, əksi də olur... İşdə olmadığım vaxt Elçin Hüseynov neçə dəfə məni gətirdib, amma özü gəlməyib. Deyib, saat 8-də işdə ol, gəlirəm işə, zəng edirəm, telefonu götürmür. Ayaz Qasımovu isə mən gözlətmişəm. Bir-iki dəfə gecikmişəm, ya gələ bilməmişəm, yatıb qalmışam. Ona görə aramız dəymişdi. Bir dəfə də Toşakın saçını qırxmalı idim. İşə vaxtında gələ bilmədim. Toşak gəlib, məni gözləmişdi. Gəldim gördüm əsəbləşib. Sakitcə saçını qırxdım, dönə-dönə üzr istədim, amma hirsi soyumadı, hirsini pulumu kəsməklə çıxdı. Mənə 12 manat pul verib getdi.

- Futbolçularla bağlı başınıza gələn maraqlı hadisələrdən danışardınız.

- Bir dəfə də "Qarabağ"ın futbolçularının saçını qırxmaq üçün qaldıqları otelə getmişdim. Axşamüstü idi. Həmin vaxtlarda otelə gəlməyim Rəşadın xoşuna gəlmirdi. Mənə deyirdi ki, bu vaxt gəlmə, gecdir, futbolçulara mane olursan. Amma yenə də məsuliyyətsizlik edib, gecikmişdim. Futbolçuların saçlarını qırxandan sonra öz-özümə dedim ki, nə yaxşı, bu gün Rəşadla qarşılaşmadım. Çıxmağa hazırlaşırdım, liftin düyməsini basdım. Liftin qapısı açıldı, içindən Rəşad çıxdı. Yenə tutdu məni, qaça bilmədim. (gülür)

- Futbola sevginiz futbolçu müştəriləriniz olandan sonra başladı?

- Düzdür, əvvəl marağım yox idi. Futbolçu müştərilərim artandan sonra bu idman növü ilə maraqlanmağa, izləməyə başladım. Yavaş-yavaş futbolun içinə girdim. Oyunlara getməyə, özüm oynamağa başladım. "Xəbəri bərbərdən alarlar" deyə bir söz var. Transfer sezonu zamanında heç kimin bilmədiyi xəbərləri mən bilirdim. Müştərin futbolçudursa, məcbur danışmağa mövzu lazımdır. (gülür)

- Kimlərin saçını düzəltmək istəyərdiniz?

- Arzularımdan biri "Barselona" azarkeşi olmağıma baxmayaraq kral klubunun əsas oyunçusu Ronaldunun saçını düzəltməkdir. Həmçinin Arda Turanı da kreslomda oturtmaq istərdim.

- Yuxarıda qeyd etdiniz ki, müştərilərinizdən dostluq etdikləriniz var.

- Əlbəttə, Vasif Məhərrəmli, Fərda Xudaverdiyev, Ədalət Şükürov, Qara Qarayevlə dostam. Onlarla sıx əlaqələrim var, tez-tez görüşürük. Birlikdə yemək yeyib, futbola baxıb, əylənirik.

- Niyə Türkiyədə yox, Azərbaycanda fəaliyyətə başladınız?

- Əslində orada da imkanım var idi. Türkiyədə də işləyə bilərdim. Sadəcə burada qohumlarım var idi, çağırdılar, gəldim. Yaxşı ki, gəlmişəm. Çox sevinirəm ki, doğru addım atmışam. Həm də nə fərqi var, eyni millətik, qardaş ölkələrik. Artıq Azərbaycan dilində rahatlıqla danışa bilirəm.

- Tanınmış müştərilərinizdən nisyə yazdıran olubmu?

- Olub. (gülür) Amma adlarını deməyəcəm, prinspilərimə ziddir.

- Yeni saç stili çıxan kimi ən çox hansı futbolçular o tərzi sizdən istəyir?

- Ruslan Abışov tez-tez stilini dəyişir. Vüqar Nadirovda alınmasa da, o hər həftə yanıma gəlir. Şehiç, ReynaldoMahir Şükürovu da bu siyahıya əlavə etmək olar. Amma Mahir pulumu çox kəsir.

- Millimizin son vaxtlar nisbətən uğurlu çıxışını necə dəyərləndirirsiniz?

- Milli komandanın oyunu ilə yanaşı ölkə çempionatı ilə də maraqlanıram. Vaxtım olduqca oyunlara gedirəm. Azərbaycan millisinin son dövrdəki uğurları danılmazdır. İnşallah, qrupdan çıxmağı bacararlar. Buna Türkiyənin uğuru qədər sevinərəm.

Milli.Az










Tags:  Ayaz Qasımovu səhvən daz edən stilist Rəşad məni otelin liftində yaxaladı FOTO

RƏYLƏR


Top news