Aktual mövzular: Dollar alış-satışı , Hava haqqında, Məzənnə, Neftin qiyməti

Bakı Nəqliyyat Agentliyi və Baş Dövlət Yol Polisi İdarəsi taksi sürücülərini maarifləndirir

Bakı Nəqliyyat Agentliyi və Baş Dövlət Yol Polisi İdarəsi taksi sürücülərini maarifləndirir

Date: 30 November 2016 12:37

Bakı. 30 noyabr.REPORT.AZ/ Bakı Nəqliyyat Agentliyi (BNA) və Bakı Şəhər Baş Polis İdarəsinin Baş Dövlət Yol Polisi İdarəsi paytaxtın inzibati ərazisində minik avtomobili ilə taksi xidməti göstərən fiziki və hüquqi şəxslər üçün maarifləndirici tədbirlərə başlayıb. 
BNA-dan "Report"a verilən məlumata görə, məqsəd taksi fəaliyyəti ilə məşğul olan sürücülərə onların hüquq və vəzifələri barədə məlumatların verilməsidir. Bu çərçivədə ilk tədbir metronun "Koroğlu" stansiyasının ətrafında keçirilib. BNA-nın müffətişləri yol patrul xidmətinin əməkdaşları ilə birgə bu ərazidə taksi fəaliyyəti ilə məşğul olan sürücülərə hüquq və vəzifələri, eləcə də ümumi qanunvericiliyin tələbləri ilə bağlı izahat işləri aparıb.
Bildirilib ki, hazırda paytaxt yollarında taksilərlə bağlı müşahidə edilən ən narahatedici məqam onların dayanma və durma qaydalarının tələbini pozaraq nəzərdə tutulmayan yerlərdə, xüsusən də avtobus dayanacaqlarında park etmələridir. Bu hal isə küçə və prospektlərdə digər hərəkət iştirakçılarına mane olmaqla avtonəqliyyat vasitələrinin sıxlığının yaranmasına səbəb olur. 
Qeyd olunub ki, BNA məsələnin həlli istiqamətində kompleks tədbrilər həyata keçirir. Bu çərçivədə ilk olaraq Bakı şəhərində taksi dayanacaqlarının pasportlaşdırılmasına başlanılıb. Agentliyin xüsusi eskpert qrupu paytaxtın bütün küçə və prospektlərində, metro stansiyaları, alış-veriş mərkəzləri və əhalinin sıx toplaşdığı digər ərazilərdə bununla bağlı təhlillər aparır. Bunun nəticəsində yerləşdiyi ərazidə nəqliyyat vasitələrinin və piyadaların hərəkətinə mane yaratmayan dayanacaqlar pasportlaşdırılır. Artıq 79 belə dayanacaq pasportlaşdırılaraq taksi sürücülərinin ixtiyarına verilib.
Maarifləndirici xarakter daşıdığından tədbir zamanı dayanma və durma qaydalarının tələbini pozan sürücülərə qarşı cərimə protokolları tərtib edilməyib. Lakin bildirilib ki, gələcəkdə qanunvericiliyin bu tələbinə əməl etməyən sürücülərə qarşı inzibati cəza tədbirləri görüləcək.
Qeyd edək ki, BNA Bakı şəhər Baş Polis İdarəsinin Dövlət Yol Polisi İdarəsi ilə birgə belə tədbirlərin mütəmadi keçirilməsi ilə bağlı razılığa gəlib.


Tags:  Bakı Nəqliyyat Agentliyi Baş Dövlət Yol Polisi İdarəsi taksi sürücülərini maarifləndirir

RƏYLƏR


Top news