2014-cü ilin dekabr ayında Ermənistan Silahlı Qüvvələri tərəfindən cəbhə xəttində atəşkəs rejimi 533 dəfə pozulub.
APA-nın Azərbaycan Müdafiə Nazirliyinin təsdiq etdiyi məlumatlar əsasında apardığı monitorinqin nəticələrinə görə, dekabr ayında atəşkəsin pozulması zamanı Azərbaycan Silahlı Qüvvələri itki verməyib.
Dekabr ayında cəbhə xətti yaxınlığında mina partlayışı nəticəsində Azərbaycan Ordusunun 1 hərbi qulluqçusu həlak olub, 1 nəfər isə yaralanıb.
Ötən ay atəşkəsin ən çox pozulması halı Ağdam rayonu istiqamətində qeydə alınıb. Qeyd olunan istiqamətdə ermənilər Azərbaycan Ordusunun mövqelərini və yaşayış məntəqələrini 162 dəfə atəşə tutublar.
Qarabağ cəbhəsində atəşkəs pozuntularının sayına görə ikinci yerdə cəbhənin Füzuli istiqaməti gəlir - 142 fakt. Bundan başqa, 2014-cü ilin dekabr ayında Ermənistan Ordusunun bölmələri atəşkəs rejimini Xocavənd rayonu istiqamətində 61, Tərtər rayonu istiqamətində 43, Goranboy rayonu istiqamətində 33, Cəbrayıl rayonu istiqamətində 29, Göygöl rayonu istiqamətində 3 dəfə pozub.
Azərbaycan-Ermənistan dövlət sərhədində isə Tovuz rayonu istiqamətində 29, Qazax rayonu istiqamətində 22, Ağstafa rayonu istiqamətində 9 dəfə atəşkəsin pozulması faktı qeydə alınıb.
